Х.Баттулга: Уул уурхайн бизнес эрхэлдэг хүмүүсийн хоргодох газар нь УИХ биш

Монгол Улсын Ерөнхийлөгч Х.Баттулга Ерөнхий боловсролын сургуулийн 48 дугаар сургууль буюу УИХ-ын 23 дугаар тойрогт саналаа өглөө. Энэхүү санал авах хэсэгт Ерөнхий сайд У.Хүрэлсүх үдээс өмнө саналаа өгсөн билээ. 

Монгол Улсын Ерөнхийлөгч Х.Баттулга "УИХ-ын найм дахь удаагийн сонгуулийг өнөөдөр өгч байна. 1990 онд ардчилсан Монгол Улс гэж зарласнаас хойш 30 гаруй жил өнгөрч байна. Энэ хугацаанд алдаж, онож олон замыг туулсан. Залуучууд сонгуульдаа идэвхтэй оролцохыг хүсэж байна.

Би залуусыг уриалах зорилгоор 17:00 цагийн ирцийн мэдээг харж байгаад ирлээ. 17:00 цагийн байдлаар улсын хэмжээнд сонгуулийн ирц 40 гаруй хувьтай, нийслэлд сонгуулийн ирц 50 гаруй хувьтай байна гэдэг мэдээлэл авсан. 22.00 цагт санал хураалт хаагдана.

Залуучууд аа, та нарын санал улс орны хөгжилд нөлөөлнө шүү. УИХ бол бага ард түмэн. Тиймээс лангуун дээрээс бараа худалдаж авахаас илүү хянамгай хандаарай. Цензуртэй сонголтоо хийгээрэй гэж та бүхнээсээ хүсье.

Зарим тойрогт санал худалдан авах асуудал яригдаж байна. Ийм зүйл үе үеийн сонгуулийн үеэр яригддаг. УИХ-д уул уурхайн бизнес эрхэлдэг хүмүүс их орж ирдэг. УИХ бол гэмт хэрэгтнүүдийн толгой хоргодох газар болсон гэж харагддаг. Тиймээс сонголтоо зөв хийгээрэй" гэлээ. 

Мөн Ерөнхийлөгч ШШГЕГ-ын харьяа Цагдан хорих 461 дүгээр ангид саатуулагдаж байгаа Н.Номтойбаяр, Ж.Эрдэнэбат, С.Баярцогт, Б.Бямбасайхан, Д.Ганболд, Х.Бат-Ялалт нарын талаар ямар байр суурьтай байгааг нь сонирхсон сэтгүүлчдийн асуултад "Шүүх эрх мэдлийн өөрсдийнх нь асуудал. Ажиглахад 2013-2016 онд гэмт хэрэгт холбогдож байсан, шүүхээс ялын дүгнэлтээ авчихсан хүмүүс байна билээ. Энэ бүхнийг ажиглаж байгаа" гэсэн хариулт өглөө.  

Асуулт, хариултыг товчлон хүргэе. 

-Нэр дэвшигч Г.Амартүвшинг 2014 онд Монгол Улсын иргэншлээс хасагдаж байсан гэх мэдээлэл таржээ. Энэ талаар танд мэдээлэл байна уу?

-2014 онд Монгол Улсын иргэншлээс хасагдсан эсэхийг би мэдэхгүй байна. Үүнийг зохих байгууллагууд нь архиваас гаргаж ирэх ёстой байх. Ер нь бол гадаадын иргэншилтэй гэсэн паспортын дугаарууд харагдаж байсан.

-Эдийн засгийн нөхцөл байдал таатай биш байна. Та шинээр бүрдэх УИХ, Засгийн газартай хэрхэн хамтарч ажиллах вэ?

-Дэлхий даяар цар тахалтай холбоотойгоор эдийн засаг ямар байдалтай байгааг бид бүгд хэлүүлэлтгүй мэдэж байгаа. Монгол орны хувьд эдийн засаг төрөлжөөгүй, хэдхэн төрлийн экспорт дээр суурилдаг. Энэ сонгуулиар байгуулагдсан УИХ, Засгийн газартай маш шуурхайгаар эдийн засгийг босгох, ард иргэдээ ядуурлаас гаргах чиглэлд хамтарч ажиллана. Би өөрөө бизнес хийж байсан хүн учраас энэ салбарын зовлон, жаргалыг ойлгодог.

-Та яагаад саналаа үдээс хойш өгч байгаа юм бэ?

-Би ирцийн мэдээллийг харж байгаад залуусыг уриалах зорилгоор 17:00 цагийн ирцийн мэдээг харж байгаад ирж байна. Ер нь цаг заадаггүй байх аа.