"Мобиком"-ын захирлуудыг дархан цаазат газарт нэвтрэх зөвшөөрлийг хурандаа Б.Гантөгс олгожээ

Өнгөрөгч долоо хоногт Дорнод аймгийн Халхгол сум, Нөмрөгийн дархан цаазат газарт гарсан гал түймрийг, Дорнод, Өмнөговь, Дорноговь, Хэнтий аймгийн Онцгой байдлын газар,  Сүхбаатар аймгийн Онцгой байдлын газрын Эрдэнэцагаан сум дахь 47 дугаар ангийн алба хаагчид, Хилийн цэргийн 0198 дугаар анги, Халхгол сумын Мэргэжлийн анги, Нөмрөгийн дархан цаазат газрын хамгаалалтын нийт 109 хүн, 18 автомашинтайгаар дөрвөн өдөр ажиллаж, өнгөрсөн шөнө цурамд оруулж, одоогоор бүрэн унтраахаар үргэлжлүүлэн ажилласаар байна.

Тэгвэл уг гал түймэр нь “Мобиком” корпорацийн япон захирлуудын унаж явсан цагаан өнгийн “Nissan Patrol-Y62” маркийн автомашин шатсанаас үүдэн гарсан гэх бөгөөд дээрх хүмүүсийг Нөмрөгийн дархан цаазат газарт ан хийх, нэвтрэх зөвшөөрлийг Хилийн цэргийн 0198 дугаар ангийн захирагч, хурандаа Б.Гантөгс албан бусаар олгожээ.

Монгол Улсын хуульд зааснаар учирсан хор хохирлын хэмжээнээс шалтгаалж буруутай этгээдэд Эрүүгийн болон Зөрчлийн тухай хуулиар шийтгэл оногдуулах бөгөөд учирсан хохирлыг бүрэн төлүүлэх заалттай.

Энэ хэргийг аймгийн цагдаагийн газраас шалгаж, хохирлын хэмжээг тогтоохоор ажиллаж байна.