Монгол Улс ОХУ-аас 20 сая ам.доллар зээлнэ

Саяхан Монгол Улсын Ерөнхий сайд Ч.Сайханбилэг ОХУ-ыг зорьж, Санкт-Петербург хотноо зохиогдсон “Олон улсын эдийн засгийн форум 2015”-д оролцсон билээ. Энэ үеэрээ Ч.Сайханбилэг ОХУ-ын Ерөнхийлөгч Владимир Путинтай уулзсан бөгөөд Ч.Сайханбилэгийг дагалдан “Олон улсын эдийн засгийн форум 2015”-д оролцсон Монгол Улсын Хөгжлийн банкны гүйцэтгэх захирал Н.Мөнхбат ОХУ-ын Внешэкономбанкны нэгдүгээр орлогч дарга Пётр Фрадковтой 20 сая ам.долларын хөрөнгө оруулалтын гэрээнд гарын үсэг зуржээ. Өөрөөр хэлбэл, Монгол Улс ОХУ-ын Засгийн газрын дэмжлэгтэйгээр тус улсын банкнаас 20 сая ам.доллар зээлэх гэрээнд гарын үсэг зурсан юм. Ямартай ч, энэ мөнгийг 1983 оноос хойш Улаанбаатар хотын цахилгаан, дулааны 80 хувийг хангаж буй 4 дүгээр цахилгаан станцийн 123 мегаваттын өргөтлийн ажилд зарцуулах гэнэ. Уг ажилд нийтдээ 70 сая ам.долларыг зарцуулахаар төлөвлөсөн бөгөөд үлдсэн 50 сая ам.долларыг “Чингис Бонд”-оос гаргах гэнэ.Монгол Улсын Хөгжлийн банкны гүйцэтгэх захирал Н.Мөнхбат гэрээ байгуулах үеэр “4 дүгээр цахилгаан станцын өргөтгөлийн ажлыг энэ оны эхэнд эхэлсэн. Бид энэ тохиролцоонд хүрэх гэж бүтэн жил зарцууллаа. Манай улс цаашид ОХУ-ын хамгийн том банк Внешэкономбанктай олон чухал төсөл, хөтөлбөрүүдэд хамтран ажиллана гэдэгт би итгэж байна” гэжээ. Дашрамд дурдахад, ОХУ-ын хамгийн том банк, 100 жилийн түүхтэй Внешэкономбанкын нийт хөрөнгө 40 тэрбум ам.доллараар хэмжигддэг бөгөөд Монгол Улсад Социализм нийгэм оршин байхад Улаанбаатарт орон сууцны олон хороолол босох хөрөнгийн эх үүсвэрийг гаргаж байжээ.