“Гуйлгачин” Засгийн газар 20 жилд аваагүй зээлийг гуравхан жилд авчээ

Ардчилсан нам Засгийн эрхэнд гарч ирмэгцэээ л “удаан хүлээсэн хүүхэд” шиг аашилж мөнгөөр ч нэг тоглох шиг болсон. “Чингис” бонд, “Самурай” бонд гэхчлэн эгээтэй л эх, хүүхдээ барьцаанд тавьчихалгүй бонд гаргаж, хаа явсан газраа өр зээл тавин гуйлга гуйж явна. Ёстой нэг юм үзээгүй хүүхэд шиг аашилсан байгаа биз. Хэдийнээ гадны орны томчуудаас “гуйлгачин” Засгийн газар нэр зүүх болсон Монгол Улсын өнөөгийн Засгийн газар сүүлийн 20 жилд тавиагүй өрийг гуравхан жилд тавьжээ.

Ерөнхий сайдаасаа авахуулаад Гадаад хэргийн сайд нь хүртэл гадаадад зочилж хурал, зөвлөгөөнд оролцохдоо мөнхийн мөнгө гуйж байсныг гаднын хэвлэлүүдэд бичсэн юм. Нөгөөтэйгүүр Монгол Улсын нүүрийг мулзсан байж авсан энэ их мөнгө хаашаа орсон нь мэдэгдэхгүй алга болж, дотоод гүн гүнзгий санхүүгийн хямрал тохиолдож, юмны үнэ эрс нэмэгдэв. 2016 оны сонгуульд гараа ч уу үгүй ч уу гарсан дээрээ олигтойхон мөнгө авч юм хийх гээд үзье. Хийж чадвал ирэх сонгуульд ялалт байгуулна. Хажуугаар нь бас олон жил тэвчсэн юм чинь ихээхэн мөнгө халааслья гэсэн бодолтой байсан нь аль 2012 оны сонгуулийн дараачаас Ардчилсан намын тухай тааварлагдаж байсан зүйл. Ямартай ч, АН өнгөрсөн хугацаанд олигтой юм хийсэнгүй, ганц нэгхэн бүтээлийг “Чингис” бондын хөрөнгөнөөс санхүүжсэн тухай ярьсан. Ямартай ч, Монгол Улсын гадаад өр 20 тэрбум ам.доллараас давчихсан байна. Энэ нь ОХУ-ын 100 жилийн түүхтэй хамгийн том банк Внешэкономбанкны нийт хөрөнгийн тал хувь гэсэн үг. Уг банк 40 тэрбум ам.долларын нийт хөрөнгөтэй бөгөөд саяхан Санкт-Петербургт болсон Олон улсын эдийн засгийн форум оролцсон Ч.Сайханбилэг яаж зүгээр байх уу “гуйлгачин” Засгийн газрын үйлийг залгамжилж ОХУ-аас 20 сая ам.доллар гуйгаад ирсэн байна. Сонирхуулахад, энэ уулзалтад Ерөнхий сайд Ч.Сайханбилэгийг дагалдаж сумогийн их аварга Д.Дагвадорж оролцож, ОХУ-ын Ерөнхийлөгч В.Путинтай танилцсан байна.