10000 төгрөгийн зоосон мөнгө гаргана

Монгол Банк үе үе нууцаар зоосон мөнгө гаргадаг бөгөөд энэ талаар хааяа нэг гаднын хэвлэлээс сонсох юм.

Дурсгалын зоосон мөнгө нэрийн доор зоосон мөнгө гаргах ажил ажил заримдаа зүгээр л мөнгө олох арга болдог ч энэ удаад тийм биш бололтой. Ирэх есдүгээр сарын 23-нд Хубилай хааны мэндэлсний 800 жилийн ой тохиох бөгөөд энэ ойг тохиолдуулан Монгол Банк Хубилай хааны хөрөг бүхий 10000-тын зоосон мөнгө гаргахаар болжээ. Гэхдээ 10000 төгрөгийн энэхүү зоосон мөнгийг гүйлгээнд хэрэглэхээр бус дурсгалын зориулалтаар гаргах аж.

Хубилай хаан /1215-09-23/ нь олон улсад Чингис хааны дараа орох нэр хүндтэй, олонд танигдсан хаан бөгөөд түүнийг хүндэтгэсэн энэхүү зоосон мөнгө 38,61 мм-ын диаметртэй, 25 гр жинтэй, цэвэр мөнгөн зоос байх аж. Түүнчлэн нүүрэн талдаа Хубилай хааны хөрөгтэй байх аж. Чингис хааны ач хүү, Монголын эзэнт гүрний тав дахь хаан Хубилайн хөрөг бүхий энэ зоосон мөнгийг 1000 хувь буюу 1000 ширхгийг худалдаанд гаргах бөгөөд цуглуулагчдын сонирхлыг маш ихээр татаж байгаа аж.

Өөрөөр хэлбэл, мөнгөн зооснууд анхны үнээсээ хэд дахин үнэд хүрэх нь нэгэнт ойлгомжтой болжээ. Юутай ч, жилийн өмнө Монгол Банк Чингис хаан, Өгөдэй хааны хөрөг бүхий цөөн тоотой, цэвэр алтан зоосон мөнгө хэвлүүлж байсан аж. Ер нь Монгол Банк Монголын бүх аугаа хаадын хөрөг бүхий зоосон мөнгө хэвлэхээр төлөвлөсөн гэнэ. Тэгвэл үүнээс өмнө гаднын аугаа удирдагчдын хөрөг бүхий зоосон мөнгө хэвлүүлсэн бололтой.

Үүний нэг жишээ болох АНУ-ын Ерөнхийлөгч асан Жон Кеннедийн хөрөг бүхий зоосон мөнгө 2007 онд худалдаанд гаргаж байсан гэж гаднын нэгэн сайтад мэдээлжээ. Түүнчлэн Монгол Банкийг 500 төгрөгийн 925 сорьцтой мөнгөн энэхүү зоосыг 5000 ширхгийг худалдаанд гаргасан гэж бичжээ. Мэдээж эдгээрийн багагүй хэсэг нь гаднынханд очсон бөгөөд тэд ч чамгүй өндөр үнээр авсан гэдгээ нуугаагүй юм.