Дорноговь эзэнгүй байна

Уг нь говийн хүмүүс элстэй уудам нутагшигээ уужим аядуухан байдаг гэх. Харин Дорноговь аймгийн өнөөгийн удирдлагуудын талаар дээрхээс тэс өөр, базаахгүй мэдээлэл олонд дуулдах болоод удаж байна. Дорноговь аймгийн Засаг дарга П.Ганхуяг, ИТХ-ын дарга нь Г.Ганбаатар гэж нөхдүүд бий. Энэ хоёр эрхмийн дундах зөрчил тулаан хэдэн жил үргэлжилж байгаа гэхэд болно. Чухам юуны төлөө ингэж тэмцэлддэг нь сүүлийн үед улам л тодорхойгүй болоод байгаа тухай нутгийнхан ярьж байна. Засаг дарга П.Ганхуягийгаа газар зарсан, төрийн албыг “төрлийн алба” болгосон гээд баахан баримт сэлт дэлгэж байгаад хоёр ч удаа албан тушаалаас нь огцруулсан. Тэр ч  байтугай хуулийн байгууллагаар шалгуулаад авсан. Гэвч Ерөнхий сайд дэмжээгүй гэсэн шалтгаанаар аймгийн ИТХ-ын шийдвэр мөхөстөж,  шалгаж байсан хуулийн байгууллага нь  ч  түдгэлзүүлээд орхисон гэдэг. Харин саяхан огцруулах шийдвэрийг удирдан хийж байсан гэх ИТХ-ын дарга Г.Ганбаатарыгаа огцруулах дээрээ тулж,  нөгөөх нь Засаг даргаа гуйж түүж албан тушаал дээрээр үлдсэн гэх яриа, мэдээ Дорноговиор нэг гарах болжээ. Юутай ч аймгийн “толгой” болсон энэ хоёр даргын тэмцлээс болж орон нутгийнхан захаас аваад ярих юм билээ.  Улаанбадрахын ураны хор хөнөөл өнөөг хүртэл арилаагүй. Сүүлд Ханги Мандалын боомт дээр гарсан хүний амины хэрэг гээд хэрэлдэж, уралцаж суухад нь болсон хэцүүхэн “хэрэг”-үүд зөндөө бий. Дорноговийн дарга нар он гарахын өмнөхнөөс сонгуулиа эхлүүлж хачин завгүй ажиллажээ.Орон нутгийн хөгжлийн сангийн хөрөнгө 758.0 сая төгрөгөөр Сайншанд сумын Зүүнбаян багт барьсан спорт цогцолборын нээлт, сүүлд арванхоёрдугаар сарын 28-нд болсон төсвийн 2.9 тэрбум төгрөгөөр барьсан Даланжаргалан сумын 60 хүүхдийн дотуур байрны нээлтэд оролцсон байна. Тэдний хамт эрхэм гишүүн Ж.Батсуурь чихэлдэж байгаад л тууз хайчилсан зурагууд аймгийн хэвлэл,  мэдээллийн хэрэгслүүдээр гарчээ.Сонгуулийн ажлаа нэгэнт эхлүүлсэн дарга нарын нүдэнд бүх хүний үйл хөдөлгөөн,  ажил сонгуультай холбоотой харагдаж эхэлсэн гэх. Намын харьяалал өөртэй нэгэн хэлтсийн дарга нь он гарахын өмнөхөн албан томилолтоор сумдаар ажиллахаар явжээ. Үүүнийг нь мэдсэн Нутгийн зөвлөлийнхөн сумдад тараах урилгаа дайчихаж. Энэ тухай хам хум сонссон Засаг дарга П.Ганхуяг нөгөөх газрын даргыг намын ажлаа хийж,  сонгуульдлаа гээд арга хэмжээ авах захирамж гаргачихсан гэнэ. Ингэж цаг наргүй ажилласан дарга нар шинэ он гаруут ор сураггүй алга болсон хачин явдал болоод байгаа ажээ. Аймгийнхан нь сураглахнээ, Засаг дарга П.Ганхуяг гэр бүлээрээ Хөвсгөл аймагт, ИТХ-ын дарга Г.Ганбаатар гэр бүлтэйгээ Улаанбаатарт амарч байгаа гэдгийг олж мэджээ. Өдгөө төрийн албаныхан хийгээд аймаг даяараа эзэнгүй,  удирдлагагүй сууцгааж байна. Гэтэл энэ жил Дорноговь аймагт өвөлжилтийн байдал сайнгүй, цас зудын байдалтай байгаа. Бас он гарснаас хойш хүйтний эрч чангарч эхэлсэн. Бас УИХ-аас гаргасан олон хууль тогтоомж 2016 оны нэг дүгээр сарын 1-нээс хэрэгжиж эхэлсэн. Гэтэл орон нутагт тэр хуулийг сурталчлах,  хэрэгжүүлэх гол албан тушаалтнууд нь амраад алга болчихсон байдаг. Хамгийн гол нь энэ аймаг эзэнгүй болоод байна.