МОНГОЛЫН СЭТГҮҮЛЧДИЙН НЭГДСЭН ЭВЛЭЛ: Хамтын ажиллагаатай орныхоо тоог 10-аар нэмлээ 

Монголын Сэтгүүлчдийн Нэгдсэн Эвлэлээс 2019 оныг гадаад харилцааны жил болгон зарлаж, 20 гаруй оронд хэрэгжих "Медиа тур" төслийг санаачилсан билээ. Энэхүү төслийн хүрээнд Монголын сэтгүүлчид Бельгийн вант улс, ОХУ, БНХАУ, БНТурк улс, БНТунис улс, Белорусь зэрэг гадаадын улс оронд ажлын айлчлал, сурвалжлага хийж, тэдгээр орны сэтгүүлчдийн холбоотой хамтын ажиллагаагаа эхлүүлээд байгаа юм.

Тэгвэл өнгөрсөн баасан гарагт /2019.09.06/ гадаадын нийт 14 орны 32 сэтгүүлч манай улсад хуран чууллаа. Энэ үеэр тэрхүү 10 орон нь МСНЭ-тэй хамтын ажиллагааны гэрээ хэлцлийг байгуулсан юм. Өмнө нь Монголын сэтгүүлчид гадаадын улс оронд очиж хамтын ажиллагааны гэрээ хэлцэл байгуулж ирсэн бол энэ удаад гадаадын сэтгүүлчдийн байгууллагын удирдлагууд МСНЭ-ийн Ерөнхийлөгч Х.Мандахбаярын урилгаар Монголд чуулж МСНЭ-тэй хамтран ажиллах санамж бичиг байгууллаа.

Тухайлбал, Польшийн хэвлэл мэдээллийн холбоо, Арабын сэтгүүлчдийн холбоо, Африкийн сэтгүүлчдийн холбоо, Украйны сэтгүүлчдийн холбоо, Индонезийн цахим хэвлэл мэдээллийн холбоо, Казахстаны сэтгүүлчдийн холбоо, Кыргызстаны сэтгүүлчдийн холбоо, ОХУ-ын Хэвлэл мэдээллийн Холбоо, БН Халимаг улсын сэтгүүлчдийн холбоо, ОХУ-ын Эрхүү мужийн "Байкал" ашгийн бус байгууллага, БН Саха улсын сэтгүүлчдийн холбоо зэрэг гадаадын 10 орноор МСНЭ-ийн харилцаа өргөжин тэлсэн онцгой үйл явдал боллоо.

Энэхүү тэмдэглэлт үйл явдалтай давхцан хуримын ёслолоо хийж буй МСНЭ-ийн ерөнхийлөгч Х.Мандахбаяр "Монголын сэтгүүлчдийн нэгдсэн эвлэл үүнээс өмнө 12 гадаадын сэтгүүлчдийн байгууллагатай хамтын ажиллагаа тогтоогоод байсан бол өнөөдөр нийт 10 байгууллагатай хамтын ажиллагааны хэлэлцээр хийснээр гадаад харилцааны цар хүрээгээ даруй хоёр дахин нэмэгдүүлж чадлаа. Мөн хүний амьдралд ганцхан тохиох гал голомтоо бадраах хуримын ёслолоороо мэргэжил нэгт сэтгүүлч нөхдөө урьж эх орныхоо өв соёл, уламжлал, Монгол хуримын ёслолыг чадах чинээгээрээ дэлхийн 20 орчим оронд нэгэн зэрэг сурталчлах үүднээс бүхий л арга хэмжээг чухамхүү гадаадын зочид та бүхэндээ зориулж бэлтгэсэн юм шүү. Нэг үгээр өөрийн хуримаа улс орныхоо гадаад сурталчилгаанд "бэлэглэх"-ээр зорьсон" гэж санамж бичиг байгуулах ёслолыг нээж хэлсэн үгэндээ онцоллоо. Ийнхүү МСНЭ хамтын ажиллагаатай орнуудынхаа тоог 10-аар нэмлээ.