Холын агаарын эргүүлийг анх удаа дугуйтай хослуулан гүйцэтгэлээ

Мотобуудлагын батальоны Хуягт тээвэрлэгчийн ротын захирагч хошууч А.Нямбаяраар ахлуулсан 14 цэргийн алба хаагч, НҮБ-ын ажилтан нар хамтран энэ сарын 15-18-ны өдрүүдэд ажиллагааны хариуцлагын бүсийн Хойд Лийч мужийн “Маёом” суурингийн чиглэлд холын агаарын эргүүлийн үүргийг дугуйтай амжилттай гүйцэтгэсэн байна. Холын эргүүлийн зорилго нь “Бентью суурин дахь НҮБ-ын бааз “Рубкона” нисэх буудал, “Маёом”, “Манкиен суурин-Рубкона” нисэх буудал-Бентью хот дахь НҮБ-ын баазын чиглэлийн холын зайн урт хугацааны агаарын эргүүл хийх, Монгол Улс, Зэвсэгт хүчнээ сурталчлах, НҮБ-ын цэргийн сүр хүчийг харуулах, БНӨСУ-д энх тайван цаг ирж буйг орон нутгийн иргэдэд мэдрүүлэх, иргэн цэргийн ажиллагааг бэхжүүлэх, Хүчний командлагчийн ажиллагааны бодлогыг хэрэгжүүлэх, НҮБ-ын цэргийн холбогч офицерууд болон энгийн ажилчдын аюулгүй байдлыг хангах, газар орны туршуул хийх, орон нутгийн ард иргэдээс мэдээлэл олж авахад чиглэгдэх аж.

Мөн түүнчлэн UNMISS ажиллагаанд үүрэг гүйцэтгэж байгаа Монгол Улсын Зэвсэгт хүчний мотобуудлагын батальоны VIII ээлжийн цэргийн алба хаагчид борооны улирлаар, байгаль, цаг уурын хүнд нөхцөлд анх удаа дугуйтай эргүүлийн үүргийг гүйцэтгэж эхэлсэн. Харин үүнээс хойш 4 дэхь удаагийн холын зайн эргүүл бөгөөд агаарын эргүүлийн үүргийг анх удаа дугуйтай хослуулан гүйцэтгэсэн. Ер нь холын эргүүлийн үүрэг гүйцэтгэх бэлтгэл ажлыг өмнөх 3 удаагийн дугуйтай эргүүлийн явцад олж авсан дадлага, туршлагадаа үндэслэн, үүрэг гүйцэтгэхэд оролцох цэргийн алба хаагчдыг сонгож бэлтгэлийг ойрын зайд, богино хугацаанд ханган амжилттай гүйцэтгэснийг ч онцоллоо.