Ерөнхий сайдын ЗАХИДЛЫГ япон айлд ХҮРГЭЖ ӨГЧЭЭ

М.Хангал | Zindaa.mn
2020 оны 01 сарын 16

Монгол Улсаас Япон Улсад суугаа Онц бөгөөд бүрэн эрхт Элчин сайд Д.Батжаргал Монгол Улсын Ерөнхий сайд У.Хүрэлсүхээс Япон Улсын Аомори мужийн иргэн М.Такамура болон түүний гэр бүлд илгээсэн захидал, дурсгалын зүйлийг Аомори мужид очиж гардуулсан байна.

Аомори мужийн захиргааны байранд болсон ёслолын ажиллагаанд Ерөнхий сайд У.Хүрэлсүхийн 26 жилийн өмнө “хоум-стэй” хийсэн айлын Митоши Такамура, эхнэр Юмико Такамура, охин Томоми Янагизава 6 сартай охины хамтаар хүрэлцэн иржээ.

Уулзалтын эхэнд Элчин сайд Д.Батжаргал М.Такамура санд хандаж “Хүсэлтийг хүлээн авч цаг зав, сэтгэл гарган Аомори хотод хүрэлцэн ирсэн явдалд талархал илэрхийлж, Монгол Улсын Ерөнхий сайд У.Хүрэлсүх 2018 оны арванхоёрдугаар сард Япон Улсад албан ёсны айлчлал хийх үеэрээ тэртээ 24 жилийн өмнө Аомори мужид ирсэн тухайгаа анх дурсан хэлж, “хоум стэй” хийсэн танай гэр бүлтэй тогтоосон холбоогоо сэргээх хүсэлт илэрхийлсэн. Өнгөрөгч 2019 оны арванхоёрдугаар сард Ерөнхий сайд У.Хүрэлсүх Япон Улсын Цог жавхлант Эзэн Хааны сэнтийд заларсныг тунхаглах ёслолд оролцох үеэрээ мөн энэ тухайгаа дахин илэрхийлж, танай гэр бүлийг Монгол Улсад урих тухай ярьсан. Ийнхүү Япон Улсын Гадаад хэргийн яамны тусламжтайгаар бид бүхэн уулзаж байгаад баяртай байна” гээд  Монгол Улсын Ерөнхий сайдаас ирүүлсэн захидлыг уншиж танилцуулан, ёслол хүндэтгэлтэйгээр түүнд гардуулжээ.

М.Такамура “Маш их баярлалаа. Сэтгэл сайхан байна. Гэнэтийн зүйл боллоо. Манай гэрт гадаадын зочид цөөнгүй ирж “хоум стэй” хийж байсан ч 26 жилийн өмнөх Монгол Улсын Ерөнхий сайд У.Хүрэлсүх бидэнд маш дотно сэтгэгдэл үлдээсэн. Түүнийг Ерөнхий сайдын хариуцлагатай албанд томилогдон ажиллаж байгааг дуулаад их баярласан. Элчин сайд Танаар дамжуулан Монгол Улсын Ерөнхий сайдаас энэхүү халуун дотно үгтэй захидал хүлээн авсандаа бид баяртай байна” гэсэн байна.
 


Элчин сайд Д.Батжаргал Ерөнхий сайд У.Хүрэлсүхээс М.Такамурад илгээсэн “Их нүүдэл” хэмээх бүтээлийг тайлбарлан гардуулж, түүний аав, эхнэр, 2 охинд Ерөнхий сайдын гарын бэлгийг өгөхийн зэрэгцээ “Таныг болон Танай гэр бүлийг Монгол Улсын Ерөнхий сайд У.Хүрэлсүх Үндэсний их баяр наадмын үеэр буюу энэ оны долдугаар сард манай улсад морилон саатахыг санал болгосон. Та бүхний манай улсад зорчих аялалын хөтөлбөр гаргах, зохион байгуулалттай холбоотой асуудалд манай ЭСЯ-ны зүгээс бүх талаар дэмжин ажиллах болно.” хэмээгээд “Монгол, Японы харилцааны уг үндэс нь иргэд хоорондын харилцаан дээр оршдог гэж би боддог. Манай хоёр улсын дотно хамтын ажиллагааны бодит илэрхийлэл болохуйц гайхалтай үйл ажиллагааны нэгэн хэсэг болж буйдаа баяртай байна” гэжээ.

Сэтгэгдэл ( 1 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Ndjd(59.153.112.9) 2020 оны 01 сарын 16

SURJIGNEXEE L BAICHILDAA

0  |  0
Top