ЗАСГИЙН ГАЗАР | ЦАР ТАХАЛ | СОРИЛТ, ШИЙДЭЛ...

Б.Болорсүх | Zindaa.mn
2020 оны 03 сарын 27

Өнөөдөр Монгол Улсын Ерөнхий сайд У.Хүрэлсүх болон Засгийн газрын гишүүд “Ковид-19” коронавирусний цах тахлын үед Монгол Улсын эдийн засгийг дэмжихэд чиглэж буй арга хэмжээ болон холбогдох бусад асуудлаар олон нийтэд хариулт өглөө.  Аж ахуйн нэгж болон иргэдээс нийгмийн даатгалын шимтгэлийг зургаан сараар авахгүй, малчдыг дэмжсэн хүү багатай зээл гаргаж, хүүхдийн мөнгийг гурван сарын хугацаанд 30 мянган төгрөг болгоно зэрэг олон чухал асуудлыг танилцуулав.

Монгол Улсын Засгийн газрын гаргасан шийдвэр болон Ерөнхий сайд У.Хүрэлсүхийн хэлсэн үгнээс онцлох эшлэлүүдийг та бүхэнд хүргэе.



МОНГОЛ УЛСЫН ЕРӨНХИЙ САЙД У.ХҮРЭЛСҮХ
 


 

  • Өнгөрсөн хугацаанд коронавирусний тархалттай холбоотойгоор Засгийн газар 10 удаа, Улсын онцгой комисс 14 удаа тус, тус хуралдсан. Тодорхой үр дүн ч гарч байгаа.
     
  • Үхэх үү, сэхэх үү гэдэг ирмэг байгаа гэдгийг хатуу хэлье.
     
  • Одоо бол засаглах цаг болсон.
     
  • Өндөр сонор сэрэмжтэй байж дараа дараагийн аюул заналхийллээс эх орон, ард түмнээ хамгаалах нь бидний үүрэг боллоо гэдгийг Ерөнхий сайдын хувиар хэлье.
     
  • Монгол Улсын Засгийн газар эрүүл мэндийн салбарт хэрэгжүүлэх арга хэмжээг санхүүжүүлэхэд зориулж 17 тэрбум төгрөг гаргасан. Нэмээд 20.6 тэрбум төгрөгийн асуудлыг шийдвэрлэлээ. Үндсэндээ ард иргэдээ хамгаалахад зориулж олон улсын байгууллагын эх үүсвэр болон бусад эх үүсвэрээс 200 тэрбум төгрөг гаргаж байгаа.
     
  • Дөрөвдүгээр сарын 01-нээс эхлэн аравдугаар сарын 01-ний өдрийг хүртэл зургаан сарын хугацаанд аж ахуйн нэгж байгууллагуудын нийгмийн даатгалын шимтгэлийг бүрэн чөлөөлж, тэглэхээр боллоо.
     
  • Мөн энэ хугацаанд иргэдийн цалингаас орлогын албан татвар авахгүй.
     
  • Дөрөвдүгээр сарын 01-нээс эхлэн аравдугаар сарын 01-ний өдрийг хүртэл 1.5 тэрбум төгрөгөөс доош орлоготой аж ахуй нэгж байгууллагаас орлогын албан татвар авахгүй.
     
  • Үйл ажиллагаа нь доголдож, хүндрэл үүссэн ч гэсэн ажлын байраа хадгалсан аж ахуйн нэгжүүдэд сар бүр ажилчдын тоогоор 200 мянган төгрөг олгоно.
     
  • Малчдын амжиргааг дэмжих зорилгоор малчдад зориулж гурван хувийн хүүтэй 300 тэрбум төгрөгийн зээлийг гаргана. Зөрүүг нь Засгийн газар хариуцна.
     
  • Бүх шатны боловсролын байгууллагын үйл ажиллагаа зогссонтой холбоотойгоор 18 хүртэлх насны хүүхдийн мөнгийг гурван сарын хугацаанд 10 мянган төгрөгөөр нэмэгдүүлнэ.
     
  • Дөрөвдүгээр сарын 15-ны өдрөөс эхлэн шатахууны литр тутмын үнийг 300-400 төгрөгөөр бууруулах арга хэмжээ авахыг Ашигт малтмал, газрын тосны газар болон холбогдох бусад байгууллагуудад өглөө.
     
  • Сая дурдсан долоон төрлийн арга хэмжээ нь нийтдээ таван их наяд төгрөгийн багц арга хэмжээ юм. Энэ бол бидний гаргаж болох боломж бололцоо юм.
     
  • Засгийн газар жилийн хугацаанд үүсэх хүндрэл, бэрхшээлийг давж гарах бололцоо байна. Дараагийн зургаан сарын төлөвлөгөөг ч бид боловсруулсан байгаа. Цагийн нөхцөл байдал хүндэрвэл стратегиа тэр даруй өөрчилнө.
     
  • Төсөвт тодотгол хийх шаардлагагүйгээр бид асуудлыг шийдсэн. Зарим улс төрчид төсөвт тодотгол хийх санаачилга гаргаж байна лээ. Тэдний бодлыг хүндэтгэнэ. Гэхдээ зайлшгүй хийх ёстой бүтээн байгуулалтын зардлыг танаж болохгүй.

САНГИЙН САЙД Ч.ХҮРЭЛБААТАР
 


 

  • Нэгдсэн төсвийн орлого өнөөдрийн байдлаар 275 тэрбумаар дутуу байна. Тиймээс бонд гаргахаар судалж байна.
     
  • Таван их наяд төгрөгийн санхүүжилтийг Монгол Улсын Засгийн газар төрийн сангийн мөнгөн хөрөнгийн удирдлагыг оновчтой хэрэгжүүлэх замаар бүрэн хэмжээгээр нь шийдээд явна.
     
  •  Бид эдийн засгийг дэмжих асуудалд долоо хэмжиж нэг огтлох зарчмаар асуудалд хандаж байгаа.
     
  • Монгол Улсын Засгийн газар, Олон улсын валютын сантай хэрэгжүүлж буй "Өргөтгөсөн санхүүжилтийн хөтөлбөр" тавдугаар сарын 24-нд хугацаандаа дуусна.
     
  • Хөтөлбөрийн хэрэгжилтийн үр дүнг Монголын тал 85 орчим хувийн үр дүнтэй хэрэгжсэн гэж дүгнэж байгаа.
     
  • Монголбанктай, Засгийн газар яаж харьцах ёстой хуулийн хүрээнд харилцаж байгаа.
     
  • Өнгөрсөн хугацаанд санхүүгийн сахилга батыг сахисан, эдийн засгийн суурь үзүүлэлтүүд сайжирсан учраас энэ мөнгөн хөрөнгийг ямар нэгэн саадгүйгээр хэрэгжүүлэх боломжтой.
     
  • Манай Засгийн газар бүрэлдэж байхад валютын нөөц нэг тэрбум ам.доллар байсан. Харин өнөөдөр 4.2 тэрбум ам.долларын валютын нөөцтэй байна. Ийм үед л ашиглах гэж нөөц бүрддэг юм.
     
  • Валютын ханшид өөрчлөлт орохгүй гэдэгт итгэлтэй байж болно.

ХӨДӨЛМӨР, НИЙГМИЙН ХАМГААЛЛЫН САЙД С.ЧИНЗОРИГ
 


 

  • Тэтгэврийн даатгалын сан дээр 300 тэрбум төгрөг, үлдсэн гурван сан дээр тодорхой хэмжээний хөрөнгө байгаа.
     
  • Нийт 38 мянган ажил олгогч, 426 мянган даатгуулагчийн төлөх нийгмийн даатгалын шимтгэлийг зургаан сарын хугацаатай тэглэнэ. Үүнээс харахад 800 тэрбум төгрөгийн нийгмийн даатгалын шимтгэл тэглэгдэнэ.
     
  • Энэ бол ажлын байрыг авч үлдэх, ажилтны орлогыг бодитой хамгаалах зорилготой.
     
  • Энэ удаагийн хөтөлбөрт хувиараа хөдөлмөр эрхэлж байгаа 180  мянган иргэдийн нийгмийн даатгалын шимтгэлийгг оруулаагүй. Дараагийн арга хэмжээнд судалж оруулна.
Top