Варшавт үер болжээ

Польшийн нутаг дэвсгэрт сүүлийн хэд хоногийн турш усархаг бороо үргэлжлэн орсны улмаас тус улсын нийслэл Варшав болон түүний ойр орчмын хотуудад үер болжээ. Их хэмжээний хур тунадас унасны улмаас Польшийн нийслэл хотын гол замын уулзварууд, орон сууцнуудын хонгил, гаражууд усанд автсан байна. Түүнээс гадна тус хотын Галт тэрэгний төв буудлын газар доорх байгууламж үерт автжээ. Аврах болон галт түймэртэй тэмцэх албаныхны мэдээлснээр иргэдээс ирж байгаа дуудлагын тоо цаг тутамд нэмэгдсээр байна. Зөвхөн Мазовец мужид гэхэд 80 гаруй дуудлага авчээ. Усархаг бороо ойрын өдрүүдэд үргэлжлэн орох төлөвтэй байгаа учраас Вепш болон Буг голуудын усны түвшин эрс нэмэгдэж, дээд хэмжээндээ хүрч болзошгүйг Цаг уурын хүрээлэнгээс сэрэмжлүулсэн байна. Цаг уурчдын мэдээлснээр усархаг бороо Польшийн төв болон зүүн нутгуудаар үргэлжлэн орно.

Эх сурвалж: МОНЦАМЭ