Гахайн бөөр шилжүүлэн суулгуулсан өвчтөн эмнэлгээс гарчээ

Хоёр долоо хоногийн өмнө гахайн бөөр шилжүүлэн суулгуулсан 62 настай өвчтөн “Massachusetts General” эмнэлгээс гарчээ.

Урьд өмнө зөвхөн туршилтын журмаар хийж байсан эл мэс заслыг эрдэмтэд эрхтэн шилжүүлэн суулгах мэс заслын түүхэнд бичигдэх үйл явдал гэж онцолжээ. 2022 онд эрдэмтэд тархи нь үхэжсэн өвчтөнд гэр бүлийнхнийх нь зөвшөөрөлтэй гахайн бөөр шилжүүлэн суулгаж байжээ.

Рика Слэйман гэгч өвчтөн олон жилийн өмнө бөөрний дутагдалд орж, долоон жилийн турш гемодиализын эмчилгээ хийлгэж байжээ. 2018 онд мөн энэ л эмнэлэгт донор хүний бөөр шилжүүлэн суулгасан ч 2023 оны тавдугаар сард донорын бөөр ондоошиж, Рика дахин гемодиализын аппаратад орсон байна. Олон жил ийм эмчилгээ хийлгэсний улмаас хоёр долоо хоног тутам цусны бүлэгнэлээ авхуулах мэс засалд орох болжээ. Тиймээс тэр гахайн бөөр шилжүүлэн суулгах мэс засалд орохоор шийдсэн байна. Тэрбээр энэ мэс засал зөвхөн түүнд бус донорын эрхтэн шаардлагатай олон мянган өвчтөнд найдвар өгөх боломж байсан гэж ярьжээ. Гуравдугаар сарын 16-нд болсон мэс засал дөрвөн цаг үргэлжилсэн. Түүнд шилжүүлэн суулгасан гений өөрчлөлттэй гахайн бөөр одоо хэвийн ажиллаж байгаа гэнэ. Кэмбрижийн эм үйлдвэрийн “eGenesis” компанийн эрдэмтэд гахайн бөөрийг шилжүүлэн суулгахад бэлтгэхдээ хүнд аюултай генийг нь авч, хүний бие организмд зохицох хүний генийг суулгасан байна.