Талибууд эмэгтэйчүүдэд олон нийтийн газар ярихыг хоригложээ

Афганистаны “Талибан” хөдөлгөөн эмэгтэйчүүдэд олон нийтийн газар ярих, нүүрээ гаргах, нимгэн даавуугаар хийсэн хувцас өмсөхийг хоригложээ. Буяныг дэлгэрүүлэх, нүглээс сэргийлэх тухай шинэ хуульд хөгжим, баяр, нийтийн тээвэр, сахал хусах зэрэг өдөр тутмын амьдралын энгийн үйл ажиллагааг тусгажээ.

Эмэгтэйчүүдийн дуу хоолойг “нүгэл” гэж үзэж байгаа тул олон нийтийн газар сонсогдох учиргүй болж байна. Эмэгтэй хүн гэртээ дуулж, ном чангаар унших бол дуу хоолой нь гудамжинд сонсогдох ёсгүй. Хуулийн хэрэгжилтийг ёс зүйн цагдаагийн алба хаагч мохтасабинууд хангах гэнэ. Мөн эмэгтэйчүүд бие, нүүрээ цусан төрлийн холбоогүй эрэгтэй хүнд харуулж болохгүй бол эрчүүдэд эмэгтэйчүүд рүү харахыг хоригложээ. Буяныг дэлгэрүүлэх, нүглээс сэргийлэх яам энэхүү дүрмийн шариатын хуульд үндэслэн баталжээ.