БНСУ | Түймрийн буруутнаар 56 настай эрэгтэйг сэжиглэжээ

Өмнөд Солонгос улсад 10 хоногийн турш үргэлжилсэн ой хээрийн түймэр дэгдэж 30 хүн амиа алдаж, их хэмжээний газар нутаг шатсан билээ. Уг хэрэгт 56 настай эрэгтэйг сэжигтнээр татан шалгаж эхэлжээ. 

213 цагийн турш ассан уг түймэрт сэжиглэгдэж буй этгээд Хойд Кёнсан мужийн Усеон дахь нэгэн толгод дээр гэр бүлийнхээ булшны дэргэд тахилын өдрийг нь тэмдэглэж байжээ. Тус гал гуравдугаар сарын 22-ны өдрийн 11:24 цагийн орчимд гарсан байж болзошгүй хэмээн тооцоолоод буй бөгөөд түүнийг ой хамгаалах тухай хуулийг зөрчсөн хэмээн буруутгаж байгаа аж. 

Гал түймэр Усеоны ойр орчмоос Андун, Чонсун, Ёньян, Ёнеок мужуудад тархаж их хэмжээний хохирол учруулсан. Тус түймрийг БНСУ-ын түүхэн дэх хамгийн их хор хохирол учруулсан гал түймэр болон тэмдэглэгдэн үлджээ. 

Уг хэрэгт сэжиглэгдэж буй этгээд өөрийг нь буруутгаж буй үйлдлийг хүлээн зөвшөөрөхгүй байгаагаа илэрхийлсэн байна. Гал гарах үед сэжигтэн эрэгтэйн охин гал унтраах байгууллагад анх дуудлага өгчээ. Дуудлагынхаа үеэр тэрээр "Гал гарч, элэнц өвөөгийн маань булш шатаж байна. Би энд аавтайгаа хамт ирсэн юм аа" хэмээн ярьсан нь бичигдэн үлдсэн байна. Тус газарт мөн сэжигтний эхнэр байсан болохыг албаныхан баталсан байна. 

Мөрдөн байцаалтын үеэр сэжигтний охин модон дахь мөчрийг холдуулах зорилгоор гал асаасан ч хүчтэй салхины улмаас гал алдаж, ийнхүү түймэр дэгдсэн хэмээсэн байна. 

Уг түймэрт ойролцоогоор 48,238 га талбай шатсан тус улсын нийслэл хотын 80 хувьтай тэнцэхүйц хэмжээний газар нутаг болохыг эх сурвалж онцолжээ. Гамшгийн улмаас 45 хүн шархтаж, 300 гаруй барилга байгуулмж сүйджээ.