МАН | Д.Амарбаясгалангийн найман захиас

Эрх баригч Монгол ардын намын 31-р их хурал яг одоо Буянт-Ухаа спорт цогцолборт болж байна. Намын их хурлын нээлтийн үеэр Бага хурлаас сонгогдсон намын дарга, УИХ-ын дарга асан Д.Амарбаясгалангийн хэлсэн үгнээс онцлон та бүхэнд хүргэе.
 

1. Эв нэгдэл

Намын гишүүдийн эв нэгдэл бол улс төрийн тогтвортой байдал, бодлогийн үр дүн гэдгийг онцолсон. Тэрээр “Эвтэй байж л бид алдаа оноогоо засч, урагшилна” гэдгийг онцолсон. Хувийн амбиц, фракцуудын ашиг сонирхлоос илүүтэй хамтын зорилгыг дээдлэх нь МАН-ын дархлаа гэдгийг тодотгов.
 

2. Шударга ёс

Шударга ёс бол зөвхөн хууль бус үйлдлийн эсрэг тэмцэл биш, харин үнэт зүйлсийн төлөөх тууштай байр суурь юм гэдгийг онцолсон.  Өнгөрсөн өдрүүдэд намын эрх мэдлийн төлөөх тэмцэл хэн нэгнийг ор үндэсгүй харлуулж байгааг өөрийн жишээн дээр онцлон “Шударга ёсыг тогтоохын төлөө дуугүй суух эрхгүй” хэмээн уриалсан нь онцлох ёстой зүйлсийн нэг байв.
 

3. Залгамж халаа

Намын шинэчлэл залуу үеийн оролцоогүйгээр үр дүнгүй гэдгийг Д.Амарбаясгалан онцлоод “Залгамж халаагаа бэлтгэхгүй бол шинэчлэл нэр төдий үлдэнэ” гэдгийг анхааруулсан нь өмнөх намын даргын салхи оруулах тухай санааг бататгасан үг байв.
 

4. Шинэчлэл

Намын шинэчлэл зайлшгүй ч зөвхөн дүрмийн өөрчлөлтөөр хязгаарлагдахгүй гэдгийг тэрээр хэлсэн үгэндээ онцолсон. Цаасан дээр дүрэм өөрчлөгдөж болох ч хариуцлагын тогтолцоо шаардлагатай гэж тэрээр үзэж байна. Хэлсэн үгэндээ “Шинэчлэл бол хэн нэгнийг халж солих биш, харин тогтолцоог засах ухаалаг алхам” гэж тодотгосон юм.
 

5. Үнэт зүйлс

Түүний үзэж байгаачлан ардчилал, эрх чөлөө, шударга ёс зэрэг үнэт зүйлсийг хамгаалах нь намын оршин тогтнох үндэс аж. Түүнийг нь нам дотор бүлэглэлүүд хөндөөд эхэлсэн учраас тэрээр ийм үг хэлэхээс өөр аргагүй. Тийм ч учраас “Үнэт зүйлдээ үнэнч үлдэх нь жинхэнэ ялалт” гэдгийг тодотгосон юм.
 

6. Хариуцлага

Намын гишүүн бүр олон нийтийн итгэлийг хөсөрдүүлэхгүй байх ёстой гэж Д.Амарбаясгалан хэлсэн үгэндээ онцолсон. Тэрээр “Хариуцлагагүй нэг гишүүн бүх намын нэр хүндийг унагадаг” гэв. Нэг ёсондоо өөрийг нь ёдроод авсан нэг биш хэсэг бусаг гишүүдийг тэрбээр хэлсэн үгэндээ “багтаана” лээ.
 

7. Тууштай байдал

Тууштай байдал бол улс төрийн замналын гол чанар. Яг энэ үг Д.Амарбаясгалангийнх гэхээсээ илүү “час улаан” өнгөөр будсан хувьсгалч ах нарынх нь үг гэдгийг санахад илүүдэхгүй. Тэрээр “Бэрхшээлээс зугтах бус, түүнийг даван туулах ухаан хэрэгтэй” гэж өөрийг нь харлуулж байсан намын ах руугаа зоригтойгоор хандаж хэлсэн үг байлаа.
 

8. Ирээдүйд итгэх итгэл

Өөрийнх нь тодорхойлсноор найм дахь захиас нь Монгол Улсын хөгжлийн ирээдүйд итгэж, хамтдаа бүтээх эрмэлзэл нь намын гишүүн бүрийн үүрэг аж. “Итгэлгүйгээр улс төрд амжилт байхгүй” гэсэн нь нийгэмд унаад буй улс төрийн намын үнэлэмжийг сэргээх, цаашлаад угтаж буй сонгуулиудад ялалт байх сэжим гэдгийг тэрээр онцоллоо. Монгол ардын намын нэн тэргүүний үүрэг бол 2027 оны Ерөнхийлөгчийн сонгуульд ялалт байгуулах явдал аж. Үүнд ялалт байгуулахгүй бол 2028 оны УИХ-ын сонгуульд ялалт байгуулж чадахгүй гэдгийг сүүлийн захиасдаа онцолсон юм.