Ким Гён Хи шүүхийн шийдвэрийг эсэргүүцэн, давж заалджээ

Өмнөд Солонгосын Ерөнхийлөгч асан Юн Сог Ёлийн эхнэр Ким Гён Хид өнгөрсөн долоо хоногт шүүхээс 20 сарын хорих ял оноосон. Ингэснээр БНСУ-ын түүхэнд анх удаа ерөнхийлөгч болон тэргүүн хатагтай нар хамт хорих ялаар шийтгүүлсэн тохиолдол болсон бөгөөд тэрээр шүүхийн шийдвэрийг эсэргүүцэн давж заалдах шатны шүүхэд ханджээ. 

Шүүхээс түүнийг 2022 оны 4-7 сарын хооронд бөө Жон Сон Бэ-тэй хамтран тансаг зэрэглэлийн эд зүйл хүлээн авч, хариуд нь эрх мэдлээ урвуулан ашиглах тохироо хийсэн хэмээн үзэж ийнхүү 1.8 жилийн ял оноосон.

Түүнд холбогдох бусад хэрэг болох Deutsch Motors компанийн хувьцааны үнэд зохиомлоор нөлөөлсөн, сонгуулийн санал асуулгын үйлчилгээ үнэ төлбөргүй авсан зэрэг хэрэг нь хангалттай нотлох баримтгүйн улмаас цагаатгагдсан бөгөөд давж заалдах шатны шүүх дээрх хэргийг хэрхэн шийдвэрлэх нь улс төрийн хүрээнийхний анхаарлыг ихээр татаж байна. 

Энэ оны нэгдүгээр сарын 16-нд Юн Сог Ёль 5 жилийн хорих ялаар шийтгүүлсэн. Түүнд холбогдох бусад хэргийн шүүх хурал 2026 оны турш үргэлжилж, тухай бүрд нь ял шийтгэл ногдуулах ажээ.