ТОДРУУЛГА | Осол гаргасан жолоочийг драйгер үлээлгэн шалгаснаас гадна цусны шинжилгээ авсан гэв

Зам тээврийн ослын улмаас гэр бүлийн гишүүдээ алдсан иргэн Н.Энх-Амгалан "Осол гаргасан хүмүүсийг цагдаа драйгер үлээлгэлгүй явуулсан" хэмээн цахим орчинд мэдээлсэн. 

Тэгвэл уг хэргийн талаар прокурорын байгууллагаас тодруулахад "Энэ оны долоодугаар сарын 15-ны өдөр Төв аймгийн Эрдэнэсант сумын нутаг дэвсгэрт зам тээврийн осол гарч нэг гэр бүлийн 3 хүн амь насаа алдсан хэрэгт цагдаагийн байгууллагаас мөрдөн шалгах ажиллагаа явуулж байна. Цагдаагийн байгууллагаас осол гарсан газарт хэргийн газарт үзлэг хийж осол гаргасан тээврийн хэрэгслийн жолооч болон уг осол гаргасан тээврийн хэрэгслээр зорчиж явсан зорчигчоос драйгер багаж ашиглан согтууруулах ундааны зүйл хэрэглэсэн эсэхийг шалгасан, цуснаас шинжилгээ авч шинжилгээ хийлгэхээр шинжилгээний байгууллагад хүргүүлсэн, одоо мөрдөн шалгах ажиллагаа үргэлжилж байна" гэв.