Путин, Трамп нар утсаар ярив

АНУ-ын төлөөлөгчид Москва, Киевт айлчилсны дараа ОХУ-ын Ерөнхийлөгч Владимир Путин АНУ-ын Ерөнхийлөгч Доналд Трамптай утсаар ярьжээ.

Талууд Трампын тусгай төлөөлөгч Стив Уиткофф, хүргэн Жаред Кушнерийн Москва, Киевт хийсэн айлчлалын үр дүнг эергээр үнэлж, Украины хямралыг зохицуулах асуудлыг хөндсөн байна. Трампын зүгээс мөргөлдөөнийг аль болох богино хугацаанд зогсоох хүсэлтэйгээ илэрхийлж, ингэснээр хоёр улсын харилцаа, тэр дундаа худалдаа, эдийн засгийн хамтын ажиллагааг сэргээх боломжтой болохыг онцолсон байна.

Путин хоёр гүрний бүтээлч хамтын ажиллагааг сэргээхийн төлөө буй Цагаан ордны тэргүүний хандлагыг үнэлж, дайны талаар дэлгэрэнгүй мэдээлээл өгчээ. Тэрбээр мөн ОХУ-ын зүгээс Европын орнуудын эсрэг түрэмгийлсэн төлөвлөгөө байхгүй болохыг онцлон тэмдэглэжээ.

Үүнтэй зэрэгцэн Украины Ерөнхийлөгч Володимир Зеленський Доналд Трамптэй энэ сарын 20-оор уулзахаар төлөвлөж буйгаа илэрхийлсэн байна.

Цагаан ордны зүгээс энэхүү мэдээллийг батлаагүй байна.

Зеленськийн ярьснаар, тэрбээр Трамптай Украинд зэвсэг нийлүүлэх асуудлыг хөндөхөөр төлөвлөж байна. Энэ асуудлыг тэрбээр Стив Уиткофф, Жаред Кушнер нартай мөн ярилцжээ. Зеленськийн хэлснээр, энэ өвөл Украины хамгаалалтад 300 пуужин шаардлагатай байгаа аж.

Мягмар гарагт Герман Украинд PAC-2 пуужин нийлүүлэхээ мэдэгдэж, Европын орнуудад хандан Берлиний жишээг дагахыг уриалжээ. Үүнтэй зэрэгцэн Их Британи Киевт 135 сая ам.долларын багц гаргахаа мөн мэдэгдээд байгаа юм.