Хүний нүднээс амьд өт гарчээ

Энэтхэгийн өндөр настан Кришнамуртийн баруун нүднээс Мумбай хотын эмч нар 12,5 см урт амьд өт гаргаж авчээ. Анх нүд бүрэлзэж загатнаад байна гэсэн өвгөний нүдэнд эмч нар эм дусаасан ч тус болоогүй байна. Улмаар нүдний угийг дурандаж өт байгааг мэдмэгц яаралтай хагалгаа хийн дээрх өтийг гаргаж авчээ. Мэс заслыг хийсэн эмч “Би 30 гаруй жил нүдний  эмчээр ажиллахдаа ийм сонин зүйл үзээгүй. Хүний нүдэнд ялаа өтөө цацах тохиолдол элбэг байдаг. Тэгэхдээ ийм урт, тэгээд амьд өт гарч ирсэн нь биднийг алмайруулсан” гэж ярьсан байна. Хүний нүдэнд орсон өт улмаар тархи руу орох магадлалтай байдаг аж. Харин  75 настай Кришнамурти үнэхээр азтай бөгөөд түүний нүдэнд уг өт хэр удаан байсныг эмч нар тогтоож чадаагүй байгаа юм байна.

 Г.Энхтуяа