6 ихэртээ автомашины брэндийн нэрүүд өгчээ

Таиландад төрсөн зургаан ихрийн ээж аав шинээр мэндэлсэн хүүхдүүддээ өөрсдийн дуртай автомашины брэндүүд болох Форчун /Toyota Fortuner/,Ауди, Порше, Мини, Фольксваген, Фиат хэмээх нэрүүдийг өгчээ.

3 хүү, 3 охин энэхүү 6 ихэр нь орчин үеийн Таиландын анхны тохиолдол юм байна.

Уламжлал ёсоор шинээр мэндэлсэн хүүхэддээ албан ёсны бичиг баримт дээр байх нэрнээс гадна ойр дотныхон нь насан туршид нь дуудах өхөөрдөж энхрийлсэн “хоч-нэрийг” өгдөг ба ихрүүдийн эцэг эх энэ заншлаар хүүхдүүдээ авто брэндийн нэрээр нэрлэсэн ажээ.

Бангкокийн оршин суугч 29 настай Дуангчанок Вангвиттхаясакун Бамрунгратын алдартай хувийн эмнэлэгт тавдугаар сард төрсөн ба эцэг эх нь хоёр сар сэтгүүлчдээс хол хөндий байж байгаад одооноос мэдээлэл өгч эхэлж байгаа ажээ.

Энэ гэр бүлийн хосууд удаан хугацаанд хүүхэдтэй болж чадалгүй байж байгаад үр шилжүүлэн суулгах замаар жирэмсэлсэн юм байна. 6 ихрийг төрсний дараа хүүхдүүдээ асрахад хамаатнуудаасаа тусламж хүсэхийн зэрэгцээ нэгэн зэрэг гурван хүүхэд асрагч хөлслөх шаардлагатай болсон аж.

Д.Мигаа