Гишүүдийн шидэлцсэн хатуу үгийн тулаан & 20 коммент

УИХ-ын чуулганы нэгдсэн хуралдаанаар өчигдөр олон асуудлыг хэлэлцсэн. Энэ бүгдээс олны анхаарлыг татаж, гишүүдийн дунд маргаан өрнүүлсэн нь Үндсэн хуулийн цэцийн гишүүнээр Д.Ганзоригийг томилох, УИХ-ын гишүүн С.Баярцогтыг УИХ-ын дэд даргын албан тушаалаас чөлөөлөх, Монгол Улсын Ерөнхий сайд Н.Алтанхуягийг огцруулах асуудал байлаа. Энэ үеэр гишүүдийн дунд өрнөсөн халуухан маргаан болон хэлсэн үгнүүдээс иш татья.

1. Ц.Нямдорж: -Хулгайчийн систем амь бөхтэй оршиж байхад Үндсэн хуулийн цэц үхсэн юм шиг сууж байна. Ийм муу ёр шүгэлсэн Үндсэн хуульд сайн манаач хэрэгтэй.
2. 2.    С.Баярцогт: -Гадаадын банкинд данс нээсэн явдал намайг Сангийн сайд болохоос өмнө, бүр Оюутолгойн гэрээг байгуулахаас ч өмнөх зүйл. Тэгэхээр хөрөнгө орлогын мэдүүлгээ буруу өгсөн алдааг минь Оюутолгойн гэрээтэй битгий холбоорой.
3. 3.    М.Батчимэг: -Хэн нэгнийг албан тушаалаас нь огцруулахын төлөө бид энд суугаагүй. С.Баярцогтын асуудлыг чуулганаар хэлэлцэж байна гэдэг чинь өөрөө их том шийтгэл.
4. М.Энхболд: -Биднийг олонхи байхад цөөнхийн бүлгээс Ес зүйн дэд хороог бүрдүүлдэг байсан. Гэтэл одоо олонхийн бүлгээс Ес зүйн дэд хороог бүрдүүлсэн нь хууль зөрчсөн үйлдэлд дүгнэлт хийх, гишүүдэд хариуцлага тооцох системийг үгүй хийхэд хүргэлээ.
5. 5.    Д.Дэмбэрэл: -Ерөнхий сайд та Үндсэн хуулийг үл ойшоож, хууль зөрчсөн үйлдлээ удаа дараа давтсан. Дураараа авирлаж, улс төрийн дарангуйллыг бий болгосноор ард түмнээ айдаст автуулсан шүү.
6. 6.    Д.Оюунхорол: -Төрийн албыг төрлийн алба болгосон Н.Алтанхуяг сайдтан хэлсэн үгээ эргэж нэг санаасай. Хурган дарга нар нэмэгдэж, хүнд сурталд автаж гүйцлээ, энэ нийгэм чинь.
7. 7.    Н.Энхболд: Сайдыг огцруулах зургаан үндэслэл нь мухардаад дахин үндэслэл нэмэхээр эрэлд гарсан гэж АН-ынхан биднийг муучилж байна. Тэр худлаа. Итгэхгүй бол Н.Алтанхуяг сайдын хууль зөрчсөн баримтуудыг үүдэнд дэлгэсэн байгаа, очиж хар.
8. 8.    Ё.Отгонбаяр: -АН-ынхан “арьс”-аа хамгаалах гээд үзэж тарж байх шиг байна. Сайд өөрөө мэдээгүй байхад хамаатан нь 17 тэрбумын тендерт ялж, дүүгийнх нь авгай дарга болчихдог ёстой сонин үлгэр байна даа.
9. 9.    Ц.Цолмон: -Хөрш орнуудын харилцаанд сэв суулгах үг хэллээ гэж гонгинохоо боль. Иймхэн шалтгаанаар огцруулаад байвал цаашид юу болох юм бэ.

10.  Н.Алтанхуяг: -“Манай Турк” гэж хэлснийхээ төлөө буруутаж байгаа юмуу, би. Тэгвэл одоо “Манай Ардын намынхан” гээд хэлчихвэл энэ намын гишүүн болчихжээ гэж хардах уу, бас.

11.  Д.Хаянхярваа: -Ерөнхий сайд хуулиа зөрчиж, хамаатан саднаа төрийн албанд томилж, тендерийн будлианд оролцож, гадаад орнуудтайгаа бүдүүлэг харьцах эрхтэй юм байна. Ийм дархан эрхтэй, давхар мэдэлтэй хүнийг огцруулах гэсэн мөхөс биднийгээ уучилна уу. Та түм бум насалж, хуулиа зөрчөөрэй.

12.  О.Содбилэг:  -Үг хэлэх, санал бодлоо илэрхийлэх эрх чөлөөг минь боогдуулж эхэлсэн. Удахгүй бодож сэтгэх, хүсч мөрөөдөхийг минь хориглож, амыг минь “таглах” байх даа.

13.  Д.Лүндээжанцан: -Алтан цээжтэй, мөнгөн бөгстэй энэ Засгийн газарт “Шинэчлэлийн” гэх үг гоёдоод байна.

14.  Ц.Оюунгэрэл: -Түүх соёлын дурсгалт зүйлс, Лениний музейн үзмэрүүдийг өмнөх Засгийн газар бидэнд хүлээлгэж өгөөгүй. Үүнд чинь хэрэг үүсгэж, хуулийн хариуцлага тооцохоор болсныг дарамт гэж битгий үзээрэй, МАН-ынхаан.

15.  Ж.Батзандан: -Наймхан сартай “Шинэчлэлийн” Засгийн газрыг унагах гэж улайрахаа боль. Өөрсдөө тийм цэвэр тунгалаг, ариухан хүмүүс гэж үү. Танай нам дотор хулгайч, луйварчин, авилгач нөхдүүд олон байгаа. Аль ч үеийн сайд нар “Сайн” гэж хэлүүлж байгаагүй дээ.

16.  Н.Энхболд: -Тэгж яривал, өмнөх Засгийн газар байгуулагдаад бас л найман сарын нүүр үзэж байхад АН-ынхан огцруулах гээд гүйж явсан биз дээ. Тэрийг чинь бид мартаагүй шүү.

17.  М.Энхболд: -Юм л бол нүүрс, бензин шатахуун гээд ярих юм. Та нарын хийж бүтээсэн гэж яриад байгаа энэ ажлуудыг чинь өмнөх Засгийн газрын үед эхлүүлсэн юм, за юу.

18.  С.Бямбацогт: -Айлын эрх хүүхдүүд шиг энэ Засгийн газрын сайд нар бүр толгой гарч суух нь ээ. Н.Алтанхуяг сайд хэтэрхий дураар нь байлгаад сурчихсан бололтой.

19.  С.Эрдэнэ: -Уйлан дуугарсаар байж төсвийн 11 тэрбум төгрөгөөр Тусгаар тогтнолын гэх тансаг ордон бариулчихаад одоо тар нар тоглолт хийж, түрээслээд сууж байгаа биз дээ.

20.  Д.Эрдэнэбат: -Төр үймүүлэх гэсэн хогийн ургамлуудыг өдий хүртэл тэжээж ирсэн нь бидний алдаа болж. МАН-ынханд ингэж тоглохыг хэзээ ч зөвшөөрөхгүй.

Р.Есүй