Тоншуул: Драмын театрын газраар бизнес хийж байгаа тэрбумтнуудыг илчлэх цаг болжээ

Нийслэлийн А зэрэглэлийн хамгийн үнэтэй газруудын нэг болох Улсын Драмын Эрдмийн Театрын хашаан дотор Драмын театрын өргөтгөл нэрээр сүндэрлэн босч байгаа барилгын жинхэнэ эзэд нь хэн бэ?  гэдэг асуудал “Тоншуул” миний анхаарлыг ихээр татлаа. Индастри ХХК гэх компани хэдэн жил дамнан барьж байгаа энэ барилгын газрын асуудал нь их хэмжээний мөнгөний үнэр дагуулж байгааг ч тодотгоё. Энэ талаар лавшруулан харахаас өмнө өгүүлэх зүйл бас байна.

Үүх түүх, соёлоороо, урлагаараа бахархдаг Монголчуудын хувьд тун таагүй санагдах мэдээлэл хэдэн жилийн өмнө гарч байв. Тэр нь Монголын анхны барилгуудын тоонд бичигддэг 100 гаруй жилийн түүхтэй  “Өндөр хоршоо”, мөн Улсын Драмын Эрдмийн Театр, Дуурь бүжгийн эрдмийн театр, Үндэсний номын сан, Байгалийн музей зэрэг газруудын барилгыг нурааж оронд нь шинэхэн барилгууд барих тухай асуудлыг тухайн үеийн БСШУЯ-ны зүгээс гаргаж байсан юм. Тэр нь  “Соёл урлагийн зарим байгууллагын материаллаг баазыг шинэчлэх дунд хугацааны төлөвлөгөө” гэгчийн дагуу хийгдэж байгаа гэх тодотголыг дагуулж байлаа. Хэдийгээр өнөөдрийн тухайд эдгээр урлаг соёлын түүхийг үнэ цэнийг илтгэж ирсэн түүхэн барилгууд нураагдчихаагүй байгаа ч, салбарын яамны энэхүү шийдвэр нь цаанаа хэсэг бусгийн бизнесийн эрх ашгийг хөндөж байсан байж гэж харахад хэтрүүлсэн болохгүй нөхцөл байдал үүсчихээд байгаа нь дээрх асуудал юм.

Учир нь нураахгүй бол болохгүй гэгдэж байсан Улсын Драмын Эрдмийн Театрыг нураадаггүй юмаа гэхэд өргөтгөхгүй бол болохгүй байна гэх асуудал босч ирж, улмаар тус театрын хашаанд Улсын Драмын эрдмийн театрын өргөтгөл гэх нэрийдлээр орон сууцны барилга, эсвэл оффисын зориулалтаар ашиглагдах нь тодорхой бус барилга  баригдаж эхлээд хэдэн жилийн нүүрийг үзээд байна. Сонирхолтой нь анх 17 давхар барилга баригдана гэгдэж байсан бол төд удалгүй 22 давхар барилга болчихсон байдаг. Барилгын ажлыг гүйцэтгэгч Индустр  ХХК нь барилгын каркасын ажлыг хийж дууссаны дараа тухайн үеийн Барилга, хот байгуулалтын яамны удирдлагууд ажилтай нь танилцахад 22 давхар барилга барих зураг төсөлтэй  байсан ч нэмж 4 давхрыг барьсан нь тодорхой болж, өндөр барилгын норм дүрэм,  машины зогсоол, ногоон байгууламж зэргийг тооцоололгүйгээр барилгын ажлаа гүйцэтгэж эхэлсэн нь илэрч, үйл ажиллагааг нь зогсоож байсан удаатай. Ер нь бол баригдаж эхэлснээс хойш барилгын ажил нь хоёр ч удаа зогсож байсан ч, өнөөдрийн тухайд Индустр ХХК нь барилгын ажлыг үргэлжлүүлэн хийгээд зогсохгүй  анх 17 давхар гэж байгаад нэмж 22 болгосныгоо дахин 4 давхраар нэмж байсан бол өдгөө бүр 32 давхар болгож сүндэрлүүлчихээд байж байхад тэдэнтэй хариуцлага тооцдог газар гэж алга байгааг илтгэж байна.

Сонирхолтой нь, Улсын Драмын Эрдмийн Театрын өргөтгөл нэрээр театрын хашаан дотор буюу улсын өмчийн газар дээр баригдаж байгаа энэ барилгын нэр нь “Соёмбот өргөө” , барилгын захиалагч нь Индустр  ХХК, гүйцэтгэгч нь мөнөөх л Индустр  ХХК байх юм. Ашиглалтад орох хугацаагаа  2014 оны 4 дүгээр улирал гэснийг та зураг дээрээс харж байгаа байх.

 Тэгэхээр энэ нь  өөр бусад эрх мэдэлтэй, мөнгө төгрөгтэй хүмүүсийн гар оролцсон бизнес байхыг үгүйсгэх арга алга байна. Ер нь бол Нийслэлийн А зэрэглэлийн хамгийн үнэтэй газруудын нэг болох Улсын Драмын Эрдмийн Театрын хашаан дотор барилгаа босгохын тулд ямар шат дамжлагаар хэрхэн зөвшөөрөл авсан нь яах аргагүй сонин байгаа юм.

Түүнчлэн дороо 2 давхар гаражтай дээшээгээ 32 давхар энэхүү барилгыг Драмын театрын өргөтгөл гэж хэн ч харахааргүй байгаа юм. Гэтэл энэхүү зураг дээр харагдаж байгаа барилгачин хятадууд амьдардаг улаан сэндвичин хавтангуудаар барьсан оромж маягийн зүйл байгаа хэсэгт Драмын өргөтгөл баригдана. Дотор нь Мини театр босно сүндэрлэнэ гэх зүйлийг Улсын Драмын Эрдмийн Театрын дарга Д.Цэрэнсамбуу нар ярьцгаадаг аж. Тэгэхээр Драмын театрын удирдлагууд театрынхаа газрыг ийм маягаар бусдад алдчихаад ийм тайван байгаагийн цаана юу нуугдаж байна вэ гэдэг асуулт яах аргагүй гарч ирж байна. Харж, мэдсээр байж, хүлээн зөвшөөрчихөөд байгаа нь Драмын удирдлагуудад өөрсдөд нь бас асуудал байгаа юм биш үү гэсэн асуултыг тавихад ч хүргэж байна.

Бас болоогүй. 32 давхар барилгынхаа хажууд дахиад 3 давхар гараж барихаар газар ухаж эхэлснийг энэ зураг дээрээс харж болж байна. Хажуу талын орон сууцны газар луу буюу нийтийн эзэмшлийн талбай руу халдаж орсон учраас иргэд бухимдлаа илэрхийлж байгаа юм билээ. Гэсэн ч өнгөрсөн жилүүдэд хууль журам зөрчин үйл ажиллагаа явуулж ирсэн тэднийг хэдэн иргэд дийлж гарж чадахгүй нь гашуун  үнэн болжээ.

 Уг нь бол Драмын гэж нэрлэгдэх энэ газарт бүхэл бүтэн гурван байгууллага бий. УБЭТ, УАДБЭЧ, Хүүхэлдэйн театр гэсэн гурван газар чихцэлдэн байцгаадаг. Хэрэв үнэхээр өргөтгөл энэ тэр нь баригдчихдаг бол зарим нь тийшээгээ нүүж орвол аятай юу.

Гэтэл түүх давтагдана гэдэг шиг юм болж байна. Учир нь хэдэн жилийн өмнө MCS групп  драмын театрын хашаанд өөрсдийнхөө дураар оффисоо бариад зогсохгүй, GrandKhaan Irish Pub-ын барилга ч боссон түүхтэй. Бас нь Алтай констракшны оффис ч  Хүүхэлдэйн театрын хажуу талын газрыг хувьдаа авчихсан л байгаа. Эдгээр газрын дээрмийн эсрэг Драмын ажилчид олноороо тэмцээд тэднийг хүчрээгүй юм. Тэгэхээр өөрийн газраа тийм маягаар алдаж ирсэн Драмын театр энэ удаа ч газраа бусдад өгчээ. Өгчээ гэхийн учир нь драмын театрын нэрээр түрий барин газрыг нь авчихаад байхад удирдлагууд нь үг дуугүй байгаагаас үзэхэд  тэд тохиролцсон байхыг үгүйсгэх аргагүй байгаа юм. Үүнийг холбогдох байгууллагынхан шалгах ёстой болов уу.

Мөн тодотгож хэлэхэд энэ баригдаж байгаа барилга 1000 метр квадрат. Дээшээгээ 32 давхар. Хэрэв оффисын зориулалтаар ашиглаж, зарах сэдлээр баригдаж байгаа бол их хэмжээний мөнгөний үнэр эндээс гарч байна. Жишээ нь,  Алтай констракшны 1 мкв нь 3750 ам.доллар байгаа юм. Тэгэхээр яг хажууд нь байрлах “Соёмбот өргөө” ийм ханшаар метр квадратын үнээ тогтоолоо гэхэд зөвхөн нэг л давхраас дунджаар 3 750 000 мянган ам.доллар олох боломжтой. Үүнийг нь 32   давхраар тооцож үзвэл тоймгүй их мөнгө гарч байгаа юм. Естой нөгөө төрөөс, татвараас, МИАТ-аас төрсөн тэрбумтнууд гэдэг шиг Драмын театрын газраар бизнес хийсэн тэрбумтнуудын асуудал ч үүн дээр яригдахгүй гэх газаргүй байна.

Энэ луйврын цаана хэний, ямар бүлэглэлийн эрх ашиг байна вэ гэдгийг хууль, хяналтын байгууллагын зүгээс шалгах цаг болсон гэж Тоншуул миний бие үзэж байна.

Ноён Тоншуул