ӨГЛӨӨНИЙ МЭНД!
Өнөөдөр 2019.11.14. Энэ оны 318 дахь өдөр. Он дуусахад 47 хоног үлдэж байна. Монгол эх оронд маань нар 07 цаг 56 минутад мандлаа.
Улаанбаатар хотод үүлшинэ. Өдөртөө -6 хэм, шөнөдөө -16 хэм хүйтэн. Та хувцсаа тохируулж өмсөөд гараарай.
Өнөөдөр Дэлхийн чихрийн шижинтэй тэмцэх өдөр. Дэлхийн улс орнуудаас Колумбад өнөөдөр Эмэгтэйчүүдийн өдрийг тэмдэглэж байна.
Энэ өдөр Америкийн хөгжмийн зохиолч Венди Карлос, Их Британийн угсаа залгамжлах хунтайж Чарльз, Америкийн жүжигчин Стивен Бишоп, Францын Ерөнхий сайд асан Доминик де Вильпен, Зөвлөлтийн уран гулгагч, Европын аварга Игорь Бобрин, Оросын жүжигчин Мария Кожевникова зэрэг алдартан мэндэлжээ.
Энэ өдөр Монгол Улсын түүхэнд болсон онцлох үйл явдлуудаас дурдвал:
1921 оны энэ өдөр Ардын Засгийн газрын Ерөнхий сайд Д.Бодоогийн нэрээр дэлхийн олон улсад хандсан тунхаглал илгээжээ.
2012 оны энэ өдөр Их Эзэн Чингис хааны мэндэлсэн өдрийг Монгол бахархлын өдөр болгон хуульчилж, бүх нийтээр тэмдэглэх баярын жагсаалтад албан ёсоор оруулав.
Энэ өдөр дэлхий дахинд болсон онцлох үйл явдлуудаас дурдвал:
1935 оны энэ өдөр АНУ-ын Ерөнхийлөгч Франклин Делано Рузвельт Филиппинийг тусгаар улс гэж зарлажээ.
1945 оны энэ өдөр Индонезийн анхны Ерөнхий сайдаар Сутан Шарир томилогдов.
1968 оны энэ өдөр Европт анх удаагаа уушги шилжүүлэн суулгах мэс ажилбар хийгджээ.
1994 оны энэ өдөр Парис, Лондоны хооронд Ла-Маншийн хонгилоор дамжин хөдөлгөөн нээгдэв.
Энэ өдөр үс засуулахад таагүй, өнгө зүс доройтно. Гахай жилтнүүд аливаа үйлийг хийхэд эерэг сайн. Харин үхэр, луу, хонь, нохой жилтнүүд аливаа үйлд хянамгай хандаарай. Өнөөдөр хууль цааз гаргах, мал адгуус номхруулах, гарагийг тахих, их хүмүүнтэй уулзахад сайн. Харин газар хагалах, ус, булгийн эх малтах, улаа гаргах, балгадын суурь тавих, нохой худалдаж авахад таагүй. Хол газар явах бол зүүн хойш мөрөө гаргавал зохистой.
Таны өнөөдрийн ажил үйлст амжилт хүсье.
Холбоотой мэдээ
Сэтгэгдэл ( 0 )