Ази хүнийг коронавирустэй гэж доромжилсон Деллэ Алли шийтгүүлнэ

Английн Тоттенхэм Хотспур клубийн тоглогч Деллэ Алли өөрийн инстаграмм хуудастаа ази гаралтай хүнийг гадуурхан, өвчтэй байж болзошгүй гэсэн утгатай видео оруулсныхаа төлөө шийтгүүлж магадгүй байна.

Английн хөлбөмбөгийн холбоо түүнийг ёс зүйгүй үйлдэл гаргаж, хүнийг арьс өнгөөр нь ялгаварласан гэж үзэж байгаа аж.

Английн хөлбөмбөгийн холбооны ёс зүйн дүрмийн 3.1-т “Нийгмийн сүлжээний хуудсаар зохисгүй үйлдэл гаргах”, 3.2-т “Хүнийг арьс өнгө, гарал угсаа, үндэстэн, хүйс, бэлгийн чиг хандлага, биеийн аль нэг согогоор нь доромжлох” зэргийг хориглосон байдаг юм.

Тэрбээр энэ видеог оруулахдаа “Юу гээч, корона. Энэ вирус намайг буудахаас ч илүү хурднаар надад халдаж магадгүй” гэх агуулгатай текст бичсэн байсан юм.

Хэдийгээр болсон явдлын дараа хөлбөмбөгч албан ёсоор уучлал эрсэн ч Английн хөлбөмбөгийн холбоо асуудлыг авч хэлэлцэхээ мэдэгдсэн билээ.

Түүнд Английн хөлбөмбөгийн холбоо мөнгөн торгууль оноож, хэд, хэдэн тоглолтод оролцохгүй байхаар шийтгэж болзошгүй.

Эх сурвалж: Guardian