ШУУРХАЙ: Коронавирусийн голомт болсон “Diamond Princess” зорчигчдоо буулгаж эхэллээ

Японы Ёкохама хотын боомтод энэ сарын 5-наас хойш карантинд орсон “Diamond Princess” тансаг зэрэглэлийн аяллын хөлөг онгоц эхний ээлжийн зорчигчдыг буулгаж эхэллээ.

Японы эрүүл мэндийн яамны мэдээлснээр, эхний ээлжид коронавирусийн халдвар илрээгүй өндөр настай 500 хүнийг буулгаж байна. Мягмар гарагт /2020.02.18/ тус хөлөг дээр нэмж 88 зорчигчдоос коронавирус илэрч, нийт халдвар авсан хүний тоо 542 болсон.

Өдгөө хөлөг онгоц дээр байгаа 3000 орчим хүнийг гурван хоногийн дотор буулгахаар төлөвлөж байна. Эхэндээ тус хөлөг дээр 50 орны зорчигч, багийн гишүүд нийлсэн 3700 хүн байсан бөгөөд халдвар авсан өвчтөнүүдийн ойролцоох эмнэлгүүдэд хүргэсэн билээ. Халдвар авсан хүмүүстэй хавьтсан зорчигчид шинжилгээний хариу гартал хөлөг дээр үлдэх юм байна.

“Diamond Princess” хөлөг онгоц өнгөрсөн сарын 20-нд Ёкохама хотоос гарч, Хонконгоор аялан энэ сарын 3-нд буцаж ирсэн. Зорчигчдын дундаас коронавирусийн халдвар авсан хүн илэрсэн тул тус улсын эрх баригчид энэ сарын 5-нд тус усан онгоц дээр хоёр долоо хоногийн хорио цээр тогтоосон бөгөөд лхагва гарагт /2020.02.19/ хорио цээрийн хугацаа дуусаж байгаа юм.