Коронавирусний халдвар дэлхийн 100 гаруй оронд тархлаа

Хамгийн сүүлийн үеийн мэдээллээр, дэлхий дахинд шинэ төрлийн коронавирусээр нийт 105586 хүн халдварлаж, халдвар нийт 101 улс оронд тархлаа гэж Дэлхийн эрүүл мэндийн байгууллага мэдээлжээ. Хятадын South China Morning Post сайтад мэдээлснээр, нийт 108555 халдварын тохиолдол бүртгэгджээ. Хамгийн сүүлд Болгар, Коста-Рика, Мальдив, Мальта, Данийн Фарерын арлууд, Францын Мартиника аралд халдварын тохиолдлууд шинээр бүртгэгджээ. Хятад улсын нутаг дэвсгэрээс гадна сүүлийн нэг хоногт халдварын нийт 3610 шинэ тохиолдол бүртгэгдэж, 71 хүн нас баржээ.

-Хятад улсад сүүлийн нэг хоногт халдвар авсан хүний тоо 40–өөр нэмэгдэж, нийт 80735-д хүрч, 22 нас барж, 1535 өвчтөн эдгэрчээ. Одоогоор, 19016 халдвар авсан өвчтөн эмнэлэгт эмчлүүлж байгаагаас 5111 өвчтөний биеийн байдал хүнд байна. Өнгөрсөн хугацаанд нийт 58600 хүн эдгэрч, 3119 хүн нас баржээ. Одоогоор, 421 сэжигтэй тохиолдол бүртгэгдээд байгаа бөгөөд 20 мянган хүн хяналтад байна.

-Францын Үндэсний ассамблейн дөрвөн гишүүн, хоёр ажилтан шинэ төрлийн коронавирусний халдвар авчээ.

-Италийн зэвсэгт хүний жанжин штабын дарга, генерал Сальваторе Фарина шинэ төрлийн коронавирусний халдвар авсан тухай ANSA агентлаг мэдээлжээ. Түүнчлэн, тус улсын Лацио, Пьемонт мужийн амбан захирагч болон хоёр хотын захирагчид коронавирусээр халдварласан болох нь батлагджээ.