Улсын Онцгой комиссын Шуурхай штабаас өнөөдөр /2020.03.16/ мэдээлэл хийлээ. 

Монгол Улсад шинэ коронавирусийн халдвар бүртгэгдсэнтэй холбоотойгоор хот хоорондын зорчигч тээвэр болон хувийн тээврийн хэрэгсэл, орон нутгийн хуваарьт нислэг, суудлын галт тэрэгний хөдөлгөөнийг энэ сарын 10-ны 07:00 цагаас эхлэн гуравдугаар сарын 16-ны 07:00 цаг хүртэл хязгаарласан. Мөн хүнс, ахуйн барааны худалдаа, нийтийн халуун ус, дугуй засвар, смарт карт борлуулах цэгээс бусад үйлчилгээний байгууллагуудын үйл ажиллагааг түр зогсоосон юм. 

Өнөөдөр Улсын онцгой комиссын шийдвэрээр хот хоорондын зорчигч тээвэр болон хувийн тээврийн хэрэгсэл, орон нутгийн хуваарьт нислэг, суудлын галт тэрэгний хөдөлгөөнийг тогтсон хугацаанд буюу нэгдүгээр сарын 16-ны 07:00 цагаас нээхээр боллоо.

Харин үйлчилгээний байгууллагуудын үйл ажиллагааг нээх эсэхийг Нийслэлийн онцгой комисс хуралдан шийдвэрлэнэ гэж Онцгой байдлын ерөнхий газрын дэд дарга Б.Ууганбаяр мэдэгдлээ. 

ҮЙЛ АЖИЛЛАГААГ НЬ ТҮР ЗОГСООСОН үйлчилгээний байгууллагууд

Нийслэлийн Онцгой комиссын шийдвэрээр дараах үйлчилгээний газруудын үйл ажиллагааг 2020 оны гуравсарын 16-ны өглөөний 07 цаг хүртэл түр хугацаагаар зогсоосон билээ. 
 

• Хүнсний худалдаанаас бусад бүх төрлийн худалдаа, үйлчилгээний газрууд /Их дэлгүүрүүдийн хүнсний худалдаанаас бусад бүх тасгууд, бүх төрлийн барааны дэлгүүр
   
• Зах, худалдааны төвийн хүнс, ахуйн хэрэглээний бараанаас бусад бүх төрлийн бараа бүтээгдэхүүний худалдаа, хүргэлтийн үйлчилгээ
   
• Бүх төрлийн хүргэлтийн хоолны үйлчилгээ
   
• Халуун усны үйлчилгээнээс бусад бүх төрлийн ахуйн үйлчилгээний цэг салбарууд /үсчин, гоёлын гоо засал, хувцас засвар, гутал захиалга, засвар, хими цэвэрлэгээ, гэр ахуйн модон эдлэл захиалга, засвар, ахуйн электрон, цахилгаан хэрэгсэл засвар, цоож, цаг, нүдний шил засварлах, түлхүүр олшруулах, цүнх захиалга, засвар, алт, мөнгө, үнэт эдлэлийн захиалга, засвар, худалдаа, гэрэл зураг авах, угаах үйлчилгээ, айл нүүлгэх үйлчилгээ/
   
• Дугуй засварын үйлчилгээнээс бусад бүх төрлийн авто засвар, үйлчилгээ, худалдааны газрууд автомашины худалдаа, авто сэлбэгийн худалдаа, бүх төрлийн авто засвар, бусад үйлчилгээ
   
• Смарт карт цэнэглэгч, борлуулагч цэгээс бусад төрлийн түргэн үйлчилгээний цэгүүд

Зохицуулсан цагийн хуваарийн дагуу 22.00 хүртэл ажиллаж буй газрууд
 

• Нийтийн үйлчилгээтэй ресторан, кафе, цайны газар, кофе шоп, түргэн хоолны газрууд