"ОХУ, Казакстанаас ирэх оюутнуудыг орон нутагт ТУСГААРЛАНА"
Шинэ төрлийн коронавирус өвчний халдварын нөхцөл байдал, түүнээс сэргийлэх чиглэлээр авч буй арга хэмжээний талаар ЭМЯ-аас өнөөдрийн /2020.03.20/ шинэчлэгдсэн мэдээллийг өглөө.
Эрүүл мэндийн яамны Эмнэлгийн тусламжийн газрын дарга Я.Буянжаргал "2020 оны нэгдүгээр сарын 9-ний өдрөөс хойш улсын хэмжээнд 2942 тохиолдлыг ажиглалтад авч, тандалт судалгаа хийсэн. Өнөөдрийн байдлаар 1804 иргэн ажиглалтад байна. Ажиглалтад буй хүмүүс "Наранбулаг", "Парк", "Зүч", "Амар" зочид буудлууд болон "Энхсаран", "Жаргалан" сувилал, "Багабаян" амралтын газар "Асралт мед" эмнэлэг ХӨСҮТ болон Цэргийн төв эмнэлэгт байгаагаас гадна Баян-Өлгий, Дархан-Уул, Дорноговь, Өмнөговь, Сэлэнгэ, Хөвсгөл, Хэнтий аймгуудад тусгаарлагдан ажиглалтад байна.
Тусгай нислэгээр ирсэн буюу Япон-Улаанбаатарын нислэгээр ирсэн 256, Сөүл-Улаанбаатарын нислэгээр ирсэн 244, Берлин-Москва-Улаанбаатарын нислэгээр ирсэн 231, Стамбул-Улаанбаатарын нислэгээр ирсэн 256 гээд нийт 983 зорчигч тусгаарлалтад байна.
Мөн ОХУ, Казахстанаас оюутнууд ирэх хүсэлтээ Элчин сайдын яамаар дамжуулан гаргаж байгаа учраас тэднийг хүлээж авах бэлтгэлээ хангаж байна. Оюутнуудыг Сэлэнгэ, Орхон, Дархан-Уул, Баян-Өлгий аймагт тусгаарлахаар байруудаа бэлдэж байна.
Анхны КОВИД-19 халдварын мэдээг нэгдүгээр сарын 3-нд хүлээн авснаас хойш эрүүл мэндийн салбар болон Засгийн газар авч хэрэгжүүлж байгаа ажлаа дүгнэн өчигдөр Эрүүл мэндийн сайдын зөвлөлийн хурлыг хуралдуулсан. Өнөөдрийн Улсын онцгой комиссын хуралдаанаар Эрүүл мэндийн сайд Д.Сарангэрэл оролцож, КОВИД-19 халдварын дэлхийн болон дотоод нөхцөл байдал, авч хэрэгжүүлж буй арга хэмжээ, цаашид хэрэгжүүлах арга хэмжээний тухай танилцуулна.
Эмнэлгийн тусламж үйлчилгээний чиглэлээр зохицуулалтуудаа тогтмол хийгээд явж байна. ХӨСҮТ-д эрчимт эмчилгээний 10 орыг тохижуулж бэлэн болголоо. Мөн шаардлагатай аппаратуудыг суурилуулах ажлыг хийж байна. Эмнэлгийн машинуудыг мөн шаардлагатай тоног төхөөрөмжөөр тоноглож, хүнд өвчтөнүүдийг тээвэрлэх нөхцөлийг бүрдүүлсэн. Хэрвээ ачаалал үүсээд эхэлбэл явуулын амбулаторийг ажиллуулах боломжийг судалж байна" гэлээ.
Холбоотой мэдээ
