Хүн амын дунд "Омикрон"-ы таван тохиолдол бүртгэгдлээ

Монгол Улсын хэмжээнд өнөөдрийн байдлаар Омикрон хувилбарын зөөвөрлөгдсөн 12, дотоодод олон нийтийн дунд хийсэн тандалтаар Омикрон хувилбарын таван тохиолдол батлагдсаныг өчигдөр /2022.01.09/ Эрүүл мэндийн яамнаас зарлалаа.

Энэ талаар Эрүүл мэндийн сайд С.Энхболд "Дэлхий дахины анхаарал татсан омикрон хувилбар 145 улсад бүртгэгдсэн. Монгол Улсын хувьд өнгөрсөн Баасан гариг буюу гаднаас ирсэн иргэдийн сорьцод 12 тохиолдол бүртгэгдсэн болохыг мэдээлсэн . Монгол Улс геномын дараалал тодорхойлох шинжилгээ хийж эхэлсэн. Өнгөрсөн хугацаанд гадаадаас ирсэн иргэд болон дотоодод бүртгэгдсэн сорьцуудад шинжилгээ хийсэн.

Өнөөдөр буюу нэгдүгээр сарын 9-ний өдөр шинжилгээний дүнгээр дотоодод коронавирусийн Омикрон хувилбарын таван тохиолдол бүртгэгдсэнийг албан ёсоор мэдэгдэж байна. Энэ долоо хоногийн хугацаанд өдөрт батлагдаж буй тохиолдлын тоо нэмэгдэх хандлагатай байна.

Сүүлийн хоёр хоногт тохиолдлын тоо өдөрт 1,000-аас дээш бүртгэгдлээ. Улаанбаатарт 700-800, орон нутагт 200-300 тохиолдол бүртгэгдэж байна. Сэлэнгэ, Өмнөговь, Баянхонгор,  Өвөрхангай аймагт өдөрт 50-аас дээш тохиолдол бүртгэгдэж байгаа нь цаашид халдварын тоо нэмэгдэх хандлагатай байгааг харуулж байгаа юм.

Сүүлийн нэг сарын хугацаанд хөдөлгөөний эрчим огцом нэмэгдсэн, тэмдэглэлт баяр өргөн хүрээнд хийгдсэн нь халдварын тоо нэмэгдэх нэг шалтгаан болсон гэж үзэж байгаа.

Омикрон хувилбарын зөөвөрлөгдсөн болон дотоодын тохиолдол илэрсэн нь манай улсад цар тахлын дөрөв дэх давлагаа эхэлж байгааг харуулж байна. Эрдэмтэд дөрөв дэх давлагааны оргил үе нь нэгдүгээр сарын сүүл, хоёрдугаар сарын эхээр байх урьдчилсан тооцооллыг гаргасан.

Омикрон хувилбар Дельта хувилбартай харьцуулахад хөнгөн шинж тэмдэгтэй байгаа нь олон улсын судлаачдын гаргасан дүгнэлтээр батлагдсан. Тиймээс иргэд айж, сандрах хэрэггүй.

Засгийн газар, Эрүүл мэндийн яам энэхүү давлагааг аль болох хөл хорихгүйгээр даван туулахаар хариу арга хэмжээг хэрэгжүүлэн ажиллаж байна. Иргэдийн оролцоо, хариуцлага, хамтын хүчээр энэ давлагааг хамтдаа даван туулж чадна гэдэгт бүрэн итгэлтэй байна" гэсэн юм.

ВИДЕО ХЭЛБЭРЭЭР ҮЗЭХ: