КОВИД-19 | Өвчлөгсдийн 72%-ийг 0-11 насныхан эзэлж байна

Коронавирусний халдварын нөхцөл байдлын талаарх өнөөдрийн ээлжит мэдээллийг Эрүүл мэндийн яамнаас хүргэлээ. 

Тус вирусний омикрон хувилбараар 0-18 насны 178 мянган хүүхэд өвчилжээ. Үүний 72 орчим хувийг 0-11 насныхан эзэлж байна.  Иймд эцэг эхчүүд бага насны хүүхдээ олон нийтийн газраар дагуулж явахгүй байхыг анхааруулж байна. 

Мөн гэр бүлийн гишүүдийн дундах халдвар өндөр хувьтай байгаа учир Сар шинийн өдрүүдэд айл хэсэхгүй байж гэр бүлийн хэмжээнд баярлахыг Эрүүл мэндийн яамнаас уриаллаа.

Энэ үеэр ХӨСҮТ-ийн захирал Ц.Билэгтсайхан "Тархалтыг илэрхийлдэг гол индикатор бол PCR шинжилгээ, түүнд илрэх эерэг хувь байдаг. Оны өмнө PCR-аар илрэх хувь 4-5 байсан. Тэгвэл долоо, долоо хоногоор нэмэгдсээр энэ үзүүлэлт энэ долоо хоногт 30 хувьд хүрсэн байна. Өөрөөр хэлбэл, 6 дахин нэмэгдсэн гэсэн үг. Өмнөх "Дельта" хувилбарын давлагааны хамгийн оргил үед PCR шинжилгээний эерэг илрэх хувь 33 хувьд хүрч байсан.

"Омикрон" хувилбар давлагаалж буй коронавирусний дөрөвдүгээр давлагааны үед эрчимт эмчилгээний заалттай, нэн хүнд үйлчлүүлэгчийн хувь 0,7-0,8 хувийн хооронд байна.

"Дельта" хувилбарын давлагааны оргил үед эрчимт эмчилгээний заалттай, нэн хүнд үйлчлүүлэгчийн индекс 2.2-2.3 хувь байсан. Хоёр дахь давлагаа буюу "Альфа" хувилбарын үед 2.7-2.8 хувь байсан. Үүнээс харахад "Омикрон"-ы давлагааг "Альфа" болон "Дельта"-гийн давлагаатай харьцуулахад эрчимт эмчилгээний заалттай нэн хүнд хүний тоо бол 2.5-3.5 дахин бага байна гэж хэлж болохоор байна.

Нас баралтын индексийг CFR үзүүлэлтээр тооцоолдог. Энэ үзүүлэлт манай улсын хувьд 0.3 хувиас хэтрэхгүй байх ёстой. "Альфа" болон "Дельта" давлагааны үед хамгийн ихдээ 0.5 хувь хүрч байсан.

Тэгвэл "Омикрон" давлагааны үед дундаар 0.04 гэсэн үзүүлэлттэй байна. Өөрөөр хэлбэл, өмнөх давлагаануудаас 10 дахин бага байгаа гэсэн үзүүлэлттэй байна" гэлээ.

ШУУД ҮЗЭХ