Байдены хүүгийн Украин дахь био лабораторийн талаарх захидлуудыг ил болгожээ

ОХУ-ын Батлан хамгаалах яам АНУ-ын Ерөнхийлөгч Жо Байдены хүү Хантер Байдены Пентагон болон гүйцэтгэгч компаниудын ажилтнуудтай Украин дахь био лабораторийн талаар харилцаж байсан захидлуудыг ил болгожээ.

Захидлуудын агуулгаас үзвэл Хантер Байден Украин нутаг дэвсгэрт өвчин үүсгэгч бичил биетүүдтэй ажиллах санхүүгийн боломж бүрдүүлж, “Black and Veach”, “Metabiota” компанид шаардлагатай хөрөнгийг төвлөрүүлэхэд гол үүрэг гүйцэтгэжээ.

ОХУ-ын Зэвсэгт хүчний Цацраг, хими, биологийн хамгаалалтын хүчний дарга Игорь Кирилловын онцолсноор эдгээр цахим захидал бий гэдгийг өрнөдийн хэвлэлүүд мөн баталжээ. Кирилловын хэлснээр, Пентагоны Украин дахь үйл ажиллагааны жинхэнэ зорилго нь шинжлэх ухаанаас хол байсныг захидлууд гэрчилж байна. Тухайлбал, “Metabiota” компанийн дэд ерөнхийлөгч тус компанийн үйл ажиллагаа Украины Оросоос соёлын болон эдийн засгийн хараат бус байдлыг хангахад чиглэсэн гэж нэгэн захидалд бичиж байжээ. “Black and Veach” компанийн үйл ажиллагаанд Украины тусгай албад хүртэл асуудал тавьж байжээ. Украины Аюулгүй байдлын албаны Херсон муж дахь газрын 2017 оны тайлангаас үзвэл АНУ-ын Цэргийн аюулыг буруулах агентлаг /DTRA/ эл компаниар дамжуулан аюултай халдварт өвчин судалдаг Украины микро биологийн лабораториудад хяналт тавихаар зэхэж байжээ. Украины Аюулгүй байдлын алба үүнтэй холбогдуулан тус улс дахь халдварын нөхцөл байдал муудах аюул нэмэгдсэн тухай онцолж байжээ.

“Metabiota” компани нь халдварт өвчин дэгдэх тухай урьдчилан мэдээлэх үйл ажиллагаагаараа нэртэй. Пентагон тус компанийг хуучин зөвлөлтийн бүрэлдэхүүнд байсан улс орнуудад халдварын нөхцөл байдлыг загварчлахад оролцуулдаг байжээ. Тус компанийг Украинд Хантер Байдены итгэмжит хүн болох “Metabiota” компанийн дэд ерөнхийлөгч Мэри Гуттиери төлөөлж байсныг захидлууд гэрчилж байна.

Дэслэгч генерал Игорь Кириллов Украинд биологийн зэвсгийн эд ангийг бүтээхэд шууд хамааралтай албан тушаалтнуудын нэрийг зарлажээ. Тэдний дунд тухайн үед “DTRA” агентлагт ажиллаж байсан, Киевт Онц аюултай бичил биетийг хадгалах төв байгуулах санаачилга гаргаж байсан Роберт Поуп багтжээ. “DTRA” агентлагийн Украин дахь салбарын тэргүүн Жоанна Уинтрол цэрэг, биологийн төслүүдийн зохицуулагчаар ажилладаг байжээ. Түүний хяналт дор боом, Конго, Крымийн чичрэг өвчин, лептоспироз зэрэг аминд аюултай өвчин үүсгэгч бичил биетийн судлах “UP-4”, “UP-6” болон “UP-8” төслүүдийг хэрэгжүүлдэг байжээ.

“Black and Veach” компанийн Украин дахь салбарыг Лэнс Липпенкотт гэгч тэргүүлдэг байна. Тэрбээр Украины Батлан хамгаалах, Эрүүл мэндийн яамдтай гол харилцагч хүн. Тус компани 2008 оноос хойш Пентагонтой хамтран ажиллаж байгаа бөгөөд Украины баруун хойд бүс нутагт риккетсиа, хачигт энцефалит зэргийг судалдаг байна.  

ОХУ-ын Батлан хамгаалах яамны мэдээллээр, АНУ цэрэг, биологийн хөтөлбөрт нь оролцож, тахал, боом өвчин үүсгэгчийг судалдаг Украин лабораториудыг санхүүжүүлэхэд зориулж 200 сая ам.доллар зарцуулжээ. Эл сүлжээнд Пентагоны төлөө ажилладаг 30 гаруй байгууллага багтдаг байна. ОХУ Украинд цэргийн ажиллагаа эхлүүлсний дараа АНУ-ын хөтөлбөртэй холбоотой бүх зүйлсийг Украинаас гаргасан байна.