“Шөнийн парад”-ын бэлтгэл амжилттай явагдлаа

Төрийн цэргийн болон хууль сахиулах байгууллагуудын бүрэлдэхүүн Тулгар төрийн 2230, 2231, Их Монгол Улсын 815, 816, Ардын хувьсгалын 100, 101 жилийн ой, Монгол Улсын Төрийн далбааны өдөрт зориулсан Цэргийн ёслолын жагсаалд оролцох бэлтгэлийг үндсэндээ хангаад байна.

Энэ удаа буюу долдугаар сарын 6-ны шөнийн 03.30 цагаас 07.30 цагийн хооронд дээрх Цэргийн ёслолын жагсаалд оролцох Төрийн цэргийн болон хууль сахиулах байгууллагуудын бие бүрэлдэхүүн жанжин Д.Сүхбаатарын талбайд нэгдсэн бэлтгэлээ амжилттай зохион байгууллаа.

Монгол түмэн, цэргийнхний нэрлэж заншсанаар “Шөнийн парад” хэмээгдэх энэхүү Цэргийн ёслолын жагсаалын нэгдсэн бэлтгэлийг хэзээ, хэрхэн болох талаар ойрын өдрүүдэд асууж лавласан хүн олон байсан болоод ч тэр үү, Их жанжны нэрэмжит талбай үзэгчид, сонирхогчдоор дүүрэн байсан юм.

Өнгөрөгч зургаадугаар сарын эхнээс Цэргийн ёслолын жагсаалд оролцох бүрэлдэхүүнийг сонгон хүн нэг бүрийн, эгнээний болон рот, батальоны жигдрэлтийн дадлагыг тус тусын байнгын байрлалд хангасан юм. Харин зургаасарын 10-ны өдрөөс ЗХЖШ-ын Ажиллагааны удирдлагын газар хариуцаж, хуучнаар Буянт-Ухаа дахь “Чингис хаан” олон улсын нисэх буудлын талбайг ашиглан хэд хэдэн удаагийн нэгдсэн бэлтгэлийг үр дүнтэй зохион байгуулсан.

Энэ жилийн хувьд, Ардын хувьсгалын 100, 101 жилийн тэгш ой тохиож буй нь бас нэгэн онцлог бөгөөд Монгол Улсын Төрийн далбааны өдөрт зориулсан Цэргийн ёслолын жагсаалд Батлан хамгаалах яам, Зэвсэгт хүчний Жанжин штаб, Хил хамгаалах Ерөнхий газар, Онцгой байдлын Ерөнхий газар, Дотоодын цэргийн штаб, Шүүхийн шийдвэр гүйцэтгэх Ерөнхий газар, Төрийн тусгай хамгаалалтын газар, Тагнуулын Ерөнхий газар, Цагдаагийн Ерөнхий газар, Зэвсэгт хүчний Хуурай замын цэрэг, Агаарын цэрэг, Тусгай хүчний цэргийн командлал, Үндэсний батлан хамгаалахын их сургууль, Дотоод хэргийн их сургууль зэрэг 14 байгууллагын 4000 гаруй алба хаагч оролцож байна.

Энэхүү Цэргийн ёслолын жагсаалыг ЗХЖШ-ын нэгдүгээр орлогч дарга, Улаанбаатар цэргийн хүрээний дарга бригадын генерал С.Ганбямба командалж буй бөгөөд тугийн чиглүүлэгчээр ЗХЖШ-ын Ажиллагааны удирдлагын газрын дарга бригадын генерал С.Дашзэвэг, тугчаар Зэвсэгт хүчний Хяналт шалгалт, үнэлгээний газрын дарга хурандаа Ж.Өсөхбаяр, тугийн хамгаалагчаар ЗХЖШ-ын Захиргааны удирдлагын хэлтсийн дарга хурандаа Д.Номт, Материал техникийн газрын Материал хангалтын төлөвлөлтийн хэлтсийн дарга хурандаа С.Баяр-Очир нар явж байна.

Түүх сөхөх аваас, Цэргийн ёслолын жагсаал нь тухайн улс орны эрх чөлөө, тусгаар тогтнол, төрийн цэргийн болон хууль сахиулах байгууллагуудын нэр төр, жавхаа хийморийн бэлгэдэл бөгөөд тэдгээр байгууллагуудын хамтын ажиллагааг илтгэн харуулдаг юм. Анх жанжин Д.Сүхбаатарын санаачилгаар 1921 оны долдугаар сарын 11-ний өдөр Нийслэл хүрээнд шинэ цагийн Цэргийн ёслолын жагсаалыг явуулж эхэлсэн бөгөөд Ардын журамт цэрэг, Ардын Арми, Зэвсэгт хүчний хөгжлийн үе шатуудад тасралтгүй явагдаж чадаагүй ч 1970-аад оноос 1992 оныг хүртэлх хугацаанд жанжин Д.Сүхбаатарын талбайд тогтмол явагдсаар иржээ.

Тодруулбал, Батлан хамгаалахын сайдын 1971 оны тушаалаар “Ардын Армийн 50 жилийн ойн цэрэг, техникийн парад”, 1986 оны тушаалаар "Ардын хувьсгалын 65 жилийн ойн зэвсэг, техникийн парад”, 1991 оны тушаалаар "Ардын хувьсгалын 70 жилийн ойн баярын цэргийн парад"-ыг тус тус явуулж байсан ба Ардын хувьсгалын ойн баяр наадмын тэгш ойн жилүүдэд цэрэг, техникийн, харин ойн бусад жилүүдэд зөвхөн цэргийн алба хаагчдын ёслолын жагсаал явагддаг байлаа. Тэрчлэн Монгол Улсын Их Хурлаас 2009 онд "Нийтээр тэмдэглэх баярын болон тэмдэглэлт өдрүүдийн тухай” хуульд нэмэлт өөрчлөлт орсны дагуу Монгол Улсын “Төрийн далбааны өдөр”-т зориулсан Цэргийн ёслолын жагсаалыг дахин явуулж эхэлснийг Та бид сайтар мэдэх биз ээ.

Хурандаа Б.Отгонбаяр