Тутанхамун хааны хараалын нууцыг тайлав

Эртний Египетийн Тутанхамун хааны бунхныг 1922 онд нээсэн 20 хүн цацрагийн хордлогын улмаас амиа алдсан гэж “Daily Mail” дамжуулжээ.

Судлаач Росс Феллоузын явуулсан судалгаагаар, бунханд санаатай байрлуулсан уран болон хортой бодисууд нь археологичдын үхлийн шалтгаан болсныг тогтоожээ. Алдарт фараоны шарил үнэхээр “хараагдсан” байсан гэхдээ эртний Египет судлаачдын үзэж байсанчлан ер бусын, ид шидийн аргаар бус биологийн аргаар гэж судалгаанд онцолсон байна. Судалгаанд дурдсанаар, Тутанхамун хааны бунхан төдийгүй Хуучин хаант улсын /МЭӨ 2700-2200 он/ үеийн бунхнууд, Гиза болон Саккара дахь үхэгсдийн хотын хэд хэдэн бунханд цацраг идэвхт радон хий илэрчээ.

Тутанхамун фараоны бунхныг 1922 онд Английн судлаач Ховард Картер анх илрүүлж байв. Тэрээр 1939 онд зүрхний шигдээсээр нас барсан. Эрдэмтэд олон жилийн турш Хожкины лимфом гэх өвчнөөр өвдсөн нь цацрагийн хордлоготой холбоотой гэж үзэж байна. Малтлагын ажлын ивээн тэтгэсэн гүн Карнарвон бунханд анх хөл тавьсан хүмүүсийн нэг бөгөөд цусны халдварын улмаас таван сарын дараа хорвоог орхижээ. Малтлагын ажилд оролцож байсан бусад хүмүүс хожим нь зүрхний дутагдал, асфикси буюу амьсгал бүтэх, цус харвах, чихрийн шижин, уушгины хатгалгаа, хордлого, хумхаа болон рентген туяа зэрэг шалтгаанаар хорвоог орхиж байжээ. Бунхныг нээсний дараа цахилгаан сүлжээнд богино хугацаанд гэмтэл гарч, Каир хот даяар цахилгаан тасарч байжээ.