“Умард урсгал” хийн хоолойг Украины тусгай албад дэлбэлсэн гэж үзэж байна

“Умард урсгал” байгалийн хийн хоолойн эсрэг хорлон сүйтгэх ажиллагааг Украины тусгай албад үйлдсэн нь илэрхий болсон учраас тус улсын эрх баригчид ХБНГУ-ын хохирол болон алдагдсан ашгийг нөхөн төлөх ёстой гэж хориг арга хэмжээний эсрэг Германы хөдөлгөөний мэдэгдэлд тэмдэглэжээ.

“Умард урсгал” байгалийн хийн хоолойг дэлбэлсэн хэрэгтэй холбоотой шинэ баримтууд илэрсэн бөгөөд Украины эрх баригчид террорист ажиллагааг зохион байгуулсныг нотлох баримтууд гарч ирсэн тухай нийтлэл Der Spiegel сэтгүүлд гарсан нь дээрх мэдэгдлийг хийх үндэслэл болсон байна. “Террорист халдлагыг Украины засгийн газар болон тагнуулын алба зохион байгуулсан нь эргэлзээгүй тул тус улсын эрх баригчид Германд учирсан биет хохирол болон алдагдсан ашгийг бүрэн нөхөн төлөх ёстой.

Энэ халдлага нь зөвхөн Оросын эсрэг төдийгүй мөн Германы ашиг сонирхол, эдийн засгийн эсрэг зориуд үйлдсэн хорлон сүйтгэх ажиллагаа байсан юм” гэж тус хөдөлгөөний мэдэгдэлд онцолжээ.

Оросын орлогын эх сурвалжийг устгах зорилгоор байгалийн хий дамжуулах хоолойг дэлбэлсэн гэдгийг Украины тагнуулын албаны офицер байсан этгээд хүлээн зөвшөөрсөн байна. Гэхдээ уг хорлон сүйтгэх ажиллагааны жинхэнэ санаачлагч нь АНУ бөгөөд тус улс байгалийн хий дамжуулах хоолой барих төслийг бүх эхнээс нь эсэргүүцэж байсан юм гэж мэдэгдэлд өгүүлсэн байна.