Нэн ховор түүхэн цуглуулгыг ТАСС-ын захиралд гардуулан өгөв

Аугаа их Эх орны дайны ялалтын 80 жилийн ойг тохиолдуулан "Кракко" уран зургийн Галерейн захирал, цуглуулагч Ч.Энхжаргал өөрийн цуглуулгаас Аугаа Эх орны дайны үеийн ТАСС- ОКНО зурагт хуудасны өвөрмөц цувралыг ОХУ-д буцаан бэлэглэжээ.

Тэрбээр Ялалтын 80 жилийн ойг угтан Москва хотноо очиж, Монгол Улсын Ерөнхий сайд Л.Оюун-Эрдэнийн нэрийн өмнөөс Хамтын ялалтын бэлэг болгон Аугаа эх орны дайны үеийн ТАСС-ОКНО-ын 29 зурагт хуудсыг ТАСС-ын Ерөнхий захирал Андрей Кондрашовт гардуулан өгсөн байна.

Ч.Энхжаргал өнгөрсөн гуравдугаар сарын сүүлээр "Аугаа их Эх орны дайны ялалт-Бидний хамтын ялалт" хэмээх эх орны дайны үеийн зурагт хуудсуудаар бүрдсэн хосгүй ховор үзмэр бүхий үзэсгэлэнг Монголын уран зургийн үндэсний Галерейд нээж, ОХУ-аас Монгол Улсад суугаа Онц бөгөөд Бүрэн эрхт Элчин Сайд А.Н.Евсиков, ЭСЯ-ны Цэргийн атташе П.В.Петрунин тэргүүтэй зочид үзэж сонирхсон билээ.

Үзэсгэлэнд Эх орны дайны үед цэрэг дайчдад урам зориг өгөх зорилгоор гаргадаг байсан ЗХУ болон БНМАУ-ын ухуулгын зурагт хуудас, фронтоос ирсэн захидал, шуудангийн марк, Монголын зураачдын дайны сэдэвт бүтээлүүдээс дэлгэж нийтэд үзүүлсэн юм. ОХУ-аас Монгол Улсад суугаа Онц бөгөөд Бүрэн эрхт Элчин Сайд А.Н.Евсиков тэр үеэр "Үзэсгэлэнд дэлгэсэн тухайн үеийн Зөвлөлтийн шилдэг зураач, урчуудын бүтээсэн дайны цагийн ухуулах хуудас, плакатууд, яруу найрагчдын шүлгүүд өнөө цагт олдохгүй болсон түүхийн үнэт гэрч юм. Өнгөрсөн оны намар ОХУ-ын ЭСЯ-ны байранд эдгээр цуглуулгаас бас дэлгэж байв. Тэгэхэд Монголд ирсэн “ТАСС” агентлагийн төлөөлөгчид эдгээр үзмэрийг хараад маш их гайхширсан. Учир нь өнөөдөр ОХУ-д ч энэ плакатуудаас бараг үлдээгүй учир хосгүй үнэт цуглуулга болж байгаа юм. Халх голын дайны сэдэвтэй плакатууд ч байна” хэмээн өндрөөр үнэлж байсан билээ.

Цуглуулгын эзэн Ч.Энхжаргалын эмэг эх нь дайны үед улаан армид морь бэлэглэж, өөрөө хүргэлцэж явсан гайхалтай түүхтэй хүн бөгөөд эмээгийнхээ үйл хэргийг үргэлжлүүлэхийн зэрэгцээ эцэг өвгөдийнхөө туулсан зам, түүхийг хойч үедээ үнэнээр үлдээхийг зорьж олон жилийн турш түүхийн гэрч болсон бүтээлүүдийг эрж хайж цуглуулан уг үзэсгэлэнг гаргаснаа хэлж байсан юм.