Абэ Хифүми: Тийм ялагдлын дараа зарим нь жүдог орхих байсан биз!

Унгарт болж буй жүдо бөхийн ДАШТ-ээс алтан медаль авна гэдэгтээ итгэлтэй очсон ч Тажикистаны Обид Жебовт ялагдаж, зөвхөн хүрэл медальтайгаар Абэ Хифүми эх орондоо буулаа. Олимпын хошой, Дэлхийн дөрвөн удаагийн аваргыг Ханэда нисэх онгоцны буудал дээр сэтгүүлчид тосон авчээ.

2019 оноос хойш буюу сүүлийн зургаан жилийн турш жингийнхээ бөхөд ч нэг ялагдаагүй, бүгдийг нь ялсан гайхамшигтай цуврал нь зогссон ч гэлээ Абэ Хифүми сэтгүүлчдийн асуултад тун тайван хариулсан байна.
 

“Сэтгэл тавгүй байгаа ч хямрах юм алга. Ялагдлын дараах барилдаан хамгийн хүнд байдаг. Тиймээс ялагдлын дараа барилдахдаа илүү хүчтэй, илүү хэрсүү байя гэж өөртөө хэлсэн.  Нэг их хийгээд байдаггүй мэхээ хийгээд ялагдсан. Үүнд учир шалтгаан ч бий.

Яагаад ялагдсанаа сайн ойлгож байгаа учраас цаашид тийм мэх хийхгүй байх нь зөв гэж бодож байгаа. Би өөрийгөө илүү хүчтэй болж чадна гэдэгт итгэж байна” хэмээн өгүүлжээ.
 

Дүү Абэ Үта нь Парисын олимпын наадамд ялагдчихаад тун их харамсаж байгааг Дэлхий нийт харсан. Гэлээ гэхдээ энэ удаагийн ДАШТ-д өрсөлдөгчдөө илүүрхсээр түрүүлж чадлаа. Дүүгийнхээ талаар ямар бодолтой байгааг нь асуухад “Тийм гомдолтой, харамсалтай ялагдлын дараахан ДАШТ-д барилдахаар очиж чадсан нь гайхамшигтай. Зарим хүн тэгж ялагдсаны дараа жүдог орхих байсан биз. Дэлхий аварга болсонд нь их баяртай байгаа” гэжээ.

Ялагдлаасаа ямар дүгнэлт хийсэн тухай нь асуухад “Мэдээж, би ялагдлаасаа дүгнэлт хийж, Олимпын наадамд гурав дахиа түрүүлэхийг хүсэж байна. Олимпын наадамд ингэж ялагдаагүйдээ баяртай байна” хэмээн хариулжээ.
 

Сэтгүүлч Абэ Үтагаас сэтгэгдлийг сонсохыг хүсэхэд “Олимпын наадамд ялагдсан болохоор заавал энэ удаад аварга болно гэж өөрийгөө ирлэж очсон. Байж болох хамгийн сайн гараа гэж энийг хэлэх байх. Энэ удаад ялалтаасаа мэдэрсэн мэдрэмж маань ч өмнөхөөс өөр байлаа. Ялах бүрийд итгэл минь улам бэхжсэн” хэмээн Абэ Үта өгүүлжээ.