Шон “Дидди” Комбст өршөөл үзүүлэхэд өөрийнх нь үг гай болж буйг Трамп мэдэгдэв

АНУ-ын Ерөнхийлөгч Дональд Трамп өнгөрсөн баасан гаригт Newsmax-т ярилцлага өгөхдөө Шон “Дидди” Комбст өршөөл үзүүлэх боломжийн тухай бодлоо хэлсэн байна.

Шон “Дидди” Комбс өнгөрсөн долоодугаар сард нэг ялалт байгуулсан гэж хэлж болно. Түүнийг хүний наймаа хийгээгүй гэж шүүх үзсэн. Гэхдээ бие үнэлүүлэх зорилгоор хүн тээвэрлэсэн гэх хоёр ч үйлдэлд ял оноох шинжтэй байгаа. Энэ хоёр хэрэг тус бүртээ 10 жилийн ялтай юм.
 

Шон “Дидди” Комбс 50 сая ам.долларын батлан даалтаар шүүх хурал хүртэл шоронгоос гарахыг хүссэн. Гэвч шүүх оргон зайлж магадгүй хэмээн болгоомжилж буй учир батлан даалтад гаргахаас татгалзсан.

Доналд Трампын хувьд Шон “Дидди” Комбстой цагтаа хамтарч ажиллаж байсан юм. Гэхдээ 2020 онд Жо Байденд сонгуулиар ялагдах үед “Трамп шиг цагаан арьстнуудыг зайлуулах хэрэгтэй. Гол нь Трампыг л унагах байсан юм шүү дээ” гэж радиод ярилцлага өгөхдөө хэлсэн гэнэ.
 

Энэ үгсийг нь мартаагүй гэдгээ Трамп ярилцлагадаа дурдаад өршөөл үзүүлэх бодолд нь ч нөлөөлөх боломжтой гэжээ.

“Шүүх дээр ялалт байгууллаа гэж баярлаад байх шиг билээ. Гэвч бүрэн дүүрэн ялалт биш хагас гэмээр юмуу даа.

Ерөнхийлөгчид нэр дэвшихэд маань тэр их айхавтар дайсагнасан. Тийм болохоор шийд гаргахад хэцүү гэдгийг та ойлгох байх, тийм үү? Бид чинь хүн. Биднийг хүмүүс элдвээр хэлэхэд таатай санагддаггүй.
 

Ялангуяа сайн харилцаатай хүн нь Ерөнхийлөгчийн сонгуульд нэр дэвшээд байхад нь аймаар мэдэгдэл хийх...Тиймээс л би яахаа мэдэхгүй байгаа юм. Тэр үгс шийд гаргахад хэцүү болгоод байгаа” гэж Трамп өгүүлжээ.

Шон “Дидди” Комбсын дээр дурдсан хоёр хэргийг шүүх хурал 10 дугаар сарын 3-нд товлогдсон. Одоогоор Нью-Йоркийн шоронд хоригдож байна.