МАН-ын Онц их хурлыг яаралтай хуралдуулахыг шаардав

Одоогоос яг нэг сарын өмнө буюу өнгөрсөн есдүгээр сарын 27-нд МАН-ын Бага хурал хуралдаж Д.Амарбаясгаланг 85.67 хувийн саналаар тус намын даргаар сонгон өмнөх дарга Л.Оюун-Эрдэнэ түүнд намын тамгыг гардуулж, МАН-ын Их хурлыг арваннэгдүгээр сарын 15-16-ны өдөр хийхээр товлосон билээ. Гэвч түүнээс хойш МАН-ын дотор өрнөж буй үйл явдлууд, нам дотор бий болсон асуудлыг МАН-ын Онц их хурал хуралдуулан яаралтай шийдвэрлэх хэрэгтэй болсон талаар өнөөдөр /2025.10.27/ УИХ-ын гишүүн, Ардын Их Хурлын дарга асан Ж.Гомбожав, УИХ-ын гишүүн асан Ч.Авдай тэргүүтэй МАН-ын ахмад гишүүд, залуу үеийн төлөөлөл болсон зарим хүн мэдээлэл хийж МАН-ын Удирдах зөвлөл, МАН-ын ерөнхий нарийн бичгийн дарга, тус намын дэргэдэх ахмад, залуучууд, эмэгтэйчүүдийн байгууллагын удирдлагад шаардлага хүргүүлэхээр боллоо.

Тэдний тавьсан шаардлагад:

• Баталсан дүрэм, журмаа зөрчиж, алдаа зөрчилтэй шийдвэр гаргаж, бүлэглэл талцал үүсгэсэн МАН-ын наймдугаар Бага хурал, Монгол Улсын Үндсэн хуулийг зөрчиж Засгийн газар огцруулсан УИХ-ын зарим гишүүний ноцтой үйл ажиллагаанд нухацтай дүгнэлт хийж, намын үйл ажиллагааг эрчимжүүлэх зорилгоор МАН-ын Онц их хурлыг яаралтай зарлан хуралдуулахыг шаардаж байна.
• МАН-ын ээлжит 31 дүгээр их хурлыг хойшлуулж, Онц их хурлын дараа хуралдуулах шийдвэр гаргах;
• МАН-ын Онц их хурлыг хуралдуулах тусгай комисс байгуулан ажиллаж, үүсэн нөхцөл байдлыг Намын бүх шатны болон намын дэргэдэх ТББ-уудын хурлаар хэлэлцүүлэн нэгдсэн дүгнэлт хийж, цаашдын бодлого, зорилгоо тодорхойлох шаардлагатай
• МАН-ын ахмад зүтгэлтнүүд болон намаа шинэчлэх залуучуудын хамтын энэхүү шаардлагыг дэмжиж нэгдэхийг намын нийт гишүүд, дэмжигчдэд уриалж байна” гэх зэрэг асуудал багтжээ.