Хэнтийд “Чингис цогцолбор” байгуулна

21 аймгийн  Газрын харилцаа, барилга хот байгуулалтын газрын дарга нарын 2013 оны нэгдсэн сургалт болж өндөрлөөд байна.  Тэд сургалт семинарын  үеэр хийсэн ажлаа тайлагнаж, хийх ажлаа төлөвлөцгөөв.

Барилга, хот байгуулалтын яамны зүгээс стратегийн бодлого, төлөвлөлт, хот байгуулалт газрын харилцааны бодлогын хэрэгжилт, барилга, барилгын материалын бодлогын хэрэгжилт, орон сууц, нийтийн аж ахуйн бодлогын хэрэгжилтийг хангуулах чиглэлээр баримтлах бодлогыг газрын дарга нар нь танилцуулав. Мөн санхүү, хөрөнгө оруулалт болон Цахим салбар-Барилга, хот байгуулалт төсөл хэрэгжүүлэх талаар мэдээлэл өгч байсан.

Шинэчлэлийн Засгийн газрын мөрийн хөтөлбөрт орсон аймаг бүрийг хот болгон хөгжүүлэх, аймаг бүрт мянган айлын орон сууц барих ажлын зураг төслөө аймгууд Барилга, хот байгуулалтын яамны удирдлагуудад  танилцуулсан юм.

Уг уулзалтын үеэр танилцуулагдсан аймгуудын хөгжлийн төлөвлөлт, зураг төслөөс Сүхбаатар аймагт  илүү бодит ажил хийгдэж эхлээд байна.

Тус аймаг 2030 он хүртэлх хөгжлийн төлөвлөгөөгөө гаргасан бөгөөд өнөөдрийн байдлаар 10 га газрыг чөлөөлж,  100 авто машины гараж барьсан байна.  Мөн аймагтаа асфальтны үйлдвэртэй болж, орон нутгийн чанартай хэд хэдэн замыг асфальтаар бүржээ.  Орон сууцны хэсэгчилсэн төлөвлөгөөний дагуу канад дүнзэн байшингуудыг барьж эхэлсэн байна. Үүнээс гадна Баруун-Уртад “Жавхлант" жишиг хороолол байгуулан дэд бүтцийн асуудлыг нь бүрэн шийдэж, дахин  дөрвөн суманд жишиг хороолол байгуулж эхэлжээ.

Харин Хэнтий аймгийн хувьд  энэ онд  “Чингис цогцолбор”-ыг байгуулахаар Соёл урлаг аялал жуулчлалын яамтай хамтран зураг төслийн уралдааныг хоёрдугаар сарын 1-нээс зарласан байна. Зураг төсөл гарсны дараа бүтээн байгуулалтын ажлууд дээрээ тендер зарлан, барилгын ажлыг эхлүүлнэ.

Мөн сургалт семинарт  шинээр байгуулагдсан Барилгын хөгжлийн төв танилцуулгаа хийж, шинээр батлагдсан норм, нормативын баримт бичгүүдийг танилцуулна. Барилгын салбарын мэргэжилтнүүдийг  тасралтгүй мэргэжил дээшлүүлэх,  мэргэшлийн зэрэг олгох талаар мэдээлэл өгсөн юм.

Улсын төсвийн хөрөнгө оруулалтаар баригдаж байгаа барилгад захиалагчийн хяналт хийхэд гарч буй зөрчил, цаашид авах арга хэмжээ, зураг төсөл боловсруулах даалгаврын талаар мөн магадлал хийхэд гардаг нийтлэг зөрчил зэрэг асуудлуудыг ярилцлаа.