Ядуурлын газрын зураглалыг анх удаа гаргажээ

Монгол Улсын хүн амын амьжиргааны түвшин, ядуурлын талаарх бодит тоо, мэдээллийг олон улсад хүлээн зөвшөөрөгдсөн аргачлалаар тооцож мэдээллийг шинэчлэх зорилгоор Үндэсний Статистикийн хороо “Өрхийн нийгэм, эдийн засгийн  судалгаа”-нд үндэслэн жил бүр ядуурлын үзүүлэлтүүдийг улс, бүсийн түвшинд тооцож ирсэн.

Тэгвэл ядуурлын үзүүлэлтүүдийг аймаг, сум дүүргийн түвшинд тооцох шаардлагын дагуу Үндэсний Статистикийн хороо ядуурлын газрын зураглалыг анх удаа гаргажээ.  Манай улсын хувьд нийслэл хот, аймгийн төв, сумын төв, хөдөө дэх ядуурлын байдал ихээхэн ялгаатай учир энэхүү ядуурлын зураглал нь засаг захиргааны анхан шатны нэгж дэх хүн амын амьжиргааны байдлыг харуулах чухал мэдээлэл болж байна.

Энэхүү зураглалыг Монгол Улсын Хүн Ам Орон сууцны 2010 оны тооллого, өрхийн нийгэм, эдийн засгийн 2011 оны судалгаа, мэдээлэлд үндэслэн ядуурлын зураглалын тооцоо, үр дүнг гаргасан. Энэ үр дүнг 5 бүс, 21 аймаг, 329сум, 9 дүүргийн түвшнээр тооцож гаргасан. Ядуурлын холбогдолтой үзүүлэлтүүдийг газрын зураг болон графикаар харах боломжтой болж байна.