Ам.долларыг зөвшөөрч, юанийг эсэргүүцэв

Монголбанкны гадаад валютын дуудлага худалдаагаар өнөөдөр  банкууд ам.доллар, юань тус тус худалдан авах санал ирүүлжээ. Харин Монголбанк 30.3 сая ам.долларыг валютын захад нийлүүлж, юаний саналыг хүлээж авсангүй. Мөн өнөөдөр банкууд валютын своп хэлцлээр ам.доллар худалдан авах санал ирүүлсэн бөгөөд Монголбанк 107.5 сая ам.долларыг валютын захад нийлүүлжээ.

Гадаад валютын дуудлага худалдаа гэдэг нь валютын дотоодын захын үйл ажиллагааг ил тод, нээлттэй явуулах, үр ашгийг нэмэгдүүлэх, төгрөгийн ханшийн тогтвортой байдлыг хангах, зах зээлийн зарчмаар тодорхойлох зорилгоор Монголбанкнаас захад оролцох нэг арга хэрэгсэл юм.

Монголбанкнаас гадаад валютын дуудлага худалдааг долоо хоног бүрийн Мягмар, Пүрэв гарагуудад тогтмол зохион байгуулдаг ба дуудлага худалдаанд зөвхөн банкны үйл ажиллагаа эрхлэх зөвшөөрөлтэй, Монгол Улсын нутаг дэвсгэр дээр үйл ажиллагаа явуулж буй банкууд оролцдог.Монголбанк нь валютын дотоодын захад оролцогчдод аливаа мэдээллийг нээлттэй хүргэхийг дэмжиж ажилладаг бөгөөд энэхүү мэдээллийн эцсийн зорилго нь валютын захын тогтвортой байдал, төгрөгийн ханшийн огцом хэлбэлзлийг үүсгэхгүй байхад чиглэгддэг юм.