Bloomberg-ийн Гүйцэтгэх захирал Монголд айлчилна

Дэлхийн эдийн засгийн мэдээллийн хамгийн том сүлжээний нэг болох “Блумберг Мультимедиа” группын Гүйцэтгэх захирал Эндрью Лак энэ оны 5-р сарын 20-21 хооронд Монгол Улсад айлчлахаар болсон байна.

Ноён Эндрью Лак Монгол Улсад хийх анхны айлчлалынхаа хүрээнд Ерөнхийлөгч Ц.Элбэгдоржид бараалхахаар төлөвлөөд байна. Түүнчлэн Монгол дахь “Блумберг” телевизийн үйл ажиллагаатай танилцаж Монгол Улсад зориулж тусгайлан гаргах төрөлжсөн вебсайтыг (Bloombertv.mn) нээх юм. Тус вебсайт нь гадаад болон дотоодод өрнөж буй эдийн засаг, санхүүгийн хамгийн сүүлийн үеийн мэдээ, мэдээллийг монгол хэлээр уншигчдад хүргэх юм. Ингэснээр Монголын уншигчид “Блумберг”-ийн 29 сая онлайн хэрэглэгчдийн хүрээлэлд багтах боломж нээгдэж байгаа юм байна.

Эндрью Лакийн хувьд дэлхийн хэвлэл мэдээллийн салбарт өөрийн гэсэн томоохон байр суурийг эзэлдэг нэгэн. “CBS News”-ийн продюсерийн албан тушаалаас ажлын гараагаа эхэлж байсан Эндрью Лак өмнө нь “NBC News”-ийн Ерөнхийлөгчөөр ажиллаж байхдаа өөрийн агентлагаа долоон жилийн дотор АНУ-ын хамгийн олон үзэгчтэй мэдээллийн байгууллага болгож чадсан юм.

Эндрью Лак 2001-2008 оны хооронд “SONY Music Entertainment” компанийн ТУЗ-ийн дарга, Гүйцэтгэх захирлын албан тушаалыг давхар хашиж байжээ. Дэлхийн хөгжмийн зах зээлийн томоохон тоглогчдын нэг болох “SONY Music Entertainment”-ийн бодлогыг тодорхойлж байх хугацаанд нь Эндрью Лакийн удирдлага доор дуучин Бейонси, попын хаан Майкл Жейксон, алдарт “AC DC” хамтлаг болон Жон Мэйер зэрэг одууд байсан аж. Медиа салбарт ажиллаж байх хугацаандаа өөрийн хийсэн бүтээлүүдээрээ удаа дараалан “EMMY AWARD” болон “ALFRED’S ” зэрэг олон улсын нэр хүндтэй шагналын эзэн болж байсан тэрбээр гэргийтэйгээ хамтарч 40 гаруй боловсролын тэтгэлгийг олгодог юм.

Мөн тэрбээр дэлхийн хоёр дахь том дуу бичлэгийн компани болох “SONY Music Entertainment”-ийг тэргүүлж байхдаа “Bertelsmann Music Group”-ийг компанидаа нэгтгэж чадсан. Эндрью Лакийн одоогийн албан ажлын хүрээнд “Блумберг” олон улсын телевизийн сүлжээ “Блумбергийн” радио болон интерактив чиглэлийн үйл ажиллагаа бүгд багтаж байна.