Криштиану Роналду: Би хүчирхийлэл үйлдээгүй, үнэн үргэлж илэрдэг

Хөлбөмбөгчин Криштиану Роналду хүчирхийллийн хэрэгт буруутгагдаад байгаа билээ. Өнгөрсөн сарын сүүлчээр 34 настай америк бүсгүй Кэтрин Майорг Криштиану Роналдуд хүчиндүүлсэн гэж зарласан юм. Бүсгүйн ярьж байгаагаар Роналду түүнийг есөн жилийн өмнө Лас-Вегасын нэгэн зочид буудлын өрөөнд дуудсан байна. Хөлбөмбөгчин түүнд болсон явдлын дараа дуугүй байлгах гэж 375.000 ам.доллар төлжээ.

Дээрх хэргийн дараа өөр хоёр ч бүсгүй 2005 онд Лондоны зочид буудалд Роналдуд хүчиндүүлсэн гэж гомдол гаргасан юм. Тэд тухайн үед нь цагдаад хандсан ч хэрэг хаагдсан байна. Түүнчлэн Кэтрин Майоргийн өмгөөлөгч бас нэгэн бүсгүй Роналдугийн хүчирхийллийн золиос болсон гэж өөрт нь хандсан талаар ярьжээ.

Америк бүсгүйн мэдэгдлийн дараа Роналду “Insnagram”-аар шууд бичлэг хийхдээ Кэтриний ярьсан зүйлийг худал гэж мэдэгдсэн. Түүний хуучин найз бүсгүйчүүд нь ч үүнийг худал зүйл гэж хэлсэн билээ.

Тэгвэл Роналду саяхан “Football Italia”-д ярилцлага өгөхдөө хүчирхийллийн хэргийн талаар анх удаагаа ам нээжээ. Тэрбээр “Хоёр долоо хоногийн өмнө бид мэдээлэл гаргасан. Би түүнд танд худлаа хэлэх ямар ч хэрэг байхгүй. Хуульчдынхаа ажилд итгэлтэй байна. Би хөлбөмбөгөө тоглож, цагийг хөгжилтэй өнгөрүүлж байна. Амьдралдаа сэтгэл хангалуун байна. Тэр бүх зүйлд санаа тавьдаг хүмүүс дэргэд минь байгаа. Үнэн үргэлж илэрдэг” гэсэн байна.

Роналду одоо их жаргалтай амьдарч байгаагаа ярьжээ. Тэр өнгөрсөн зун 24 настай найз бүсгүй Жоржина Родригестоо гэрлэх санал тавьсан бөгөөд хосууд 11 сартай охинтой билээ. Роналдугийнх мөн долоон настай хүү, тээгч эхээс төрсөн ой гарантай ихрүүдтэй.