”Кибер сүлжээ” кино телевизийн сувгууд, IPTV-ээр үнэ төлбөргүй гарна

“Хүүхдэд зориулсан уран бүтээл туурвихад төрөөс санхүүгийн дэмжлэг үзүүлэх журам”-ын дагуу 2017 онд зохион байгуулсан "Хүүхдэд зориулсан уран бүтээлийн XI уралдааны" Уран сайхны кино төрөлд шилдгээр шалгарсан “Кибер сүлжээ” зохиолыг бүрэн хэмжээний кино бүтээл болгох төслийн багийг шалгаруулах уралдааныг энэ оны долдугаар сард Соёл, урлагийн газраас олон нийтэд нээлттэй зарласан. Уралдааны орон тооны бус мэргэжлийн зөвлөлийн шийдвэрээр ТВ-6 телевиз шалгарч, уг төслийг гүйцэтгэжээ.

Төслийн хүрээнд бүтээгдсэн “Кибер сүлжээ” уран сайхны кино энэ сарын 7-нд нээлтээ хийсэн бол одоо телевизийн сувгууд болон IPTV-ээр үнэ төлбөргүй үзэгчдийн хүртээл болгох ажээ. "Кибер сүлжээ" киноны зураг авалт нийслэлийн 20 дугаар дунд сургуульд хийгдсэн бөгөөд бүтээлийн гол санаа нь дунд сургуулийн сурагчид дунд цахим хэрэглээ ямар эрсдэл дагуулж, нөлөөлж байгааг харуулах ба нийгмийн сүлжээний зохистой хэрэглээг бий болгохыг уриалсан байна.