В.Янжаа: Ой тогтоолтын ДАШТ дээр Монголын туг ч байгаагүй!

 Ой тогтоолтын Дэлхийн аварга шалгаруулах тэмцээнд оролцож, мөнгөн медаль хүртэн, дэлхийн рекорд амжилтыг эвдсэн В.Янжмаа сэтгэл дундуур байгаа илэрхийлжээ. Тэрбээр "5 минутад 413 дүрс цээжилж, дэлхийн рекорд эвдсэн ч тэмцээн зохион байгуулагчдын зүгээс гадуурхах байдал үзүүлсэн" гэсэн байв. Сошиал хуудсанд бичсэн түүнийг сэтгэгдлийг хүргэе. Түүнийг бид "Авьяаслаг шведүүд" шоунд амжилттай оролцож, алтан баззерын эзэн болж байснаар нь сайн мэдэх билээ.

-Ой тогтоолтын Дэлхийн аварга шалгаруулах тэмцээнд Монголынхоо нэрийн өмнөөс оролцож, мөнгөн медаль авлаа. Таван минутад багтаан 413 дүрс цээжилснээр дэлхийн рекорд амжилт тогтоолоо. Харамсалтай нь, энэ тэмцээн миний хувьд баяр бахдал, амжилт ололтоос илүү "алагчлал, бухимдал, гомдол гуниг" боллоо. Юуны түрүүнд хэлэхэд, зарим орны тамирчид, тэр дундаа монголчуудад "визний бэрхшээл"-тэй оронд тэмцээнийгзориудаар зохион байгуулснаар дэлхийд өндөр чансаатай тамирчид оролцож чадсангүй. Хоёрдугаарт, ой тогтоолтын тэмцээн бол сэтгэл санааны маш тайван байдалд, анхаарлаа сайтар төвлөрүүлж байж амжилт гаргадаг спорт гэдгийг мэдсээр байж зарим нэг тэмцээн зохион байгуулагч санаатайгаар "Хорлон сүйтгэх ажиллагаа" явууллаа гэж би үзэж байна. Жишээлбэл, "Хуудсаа нэг секундээр хурдан эргүүллээ, цаасны цаанаас нь нэвт харчихлаа" гэх мэтийн хөгийн шалтаг тавин, "Мөрдөн байцаалт" явуулж байна гэж чухал тэмцээний өмнөхөн сэтгэл санааны дайралт хийж, ухаан санаа хямраах ажиллагааг удаа дараалан явууллаа. Миний ёс суртахуун, шударга зан байдлыг дорд үзсэн, үндэслэлгүй бөгөөд үр дүнгүй иймэрхүү арга хэмжээ нь зөвхөн намайг ялуулахгүй гэсэндээ биш монгол хүнийг ялуулахгүй байх гэсэн ялгаварлан гадуурхах ажиллагаа гэж надад ойлгогдлоо. Тэдний зурагт хуудас, танилцуулга дээр Монголын туг ч байгаагүй! Энэ удаагийн тэмцээн хэдийгээр "Дэлхийн аварга шалгаруулах тэмцээн" нэртэй боловч бараг Европын хэмжээний л тэмцээн болчихлоо. Энэ бүхнээс үүдээд хоёр зүйлийг хэлмээр байна. Монгол Улсын Засгийн газар тамирчдаа гадаадад тэмцээнд оролцуулах тал дээр өөрсдийн дэмжлэгээ дипломат шугамаар өгч байгаасай гэж хүсч байна. Мөн тэмцээнд оролцох явцад гарч болзошгүй "алагчлах" явдалд хаанаас ирсэн, хэн ч бай өртөх магадлалтай тул тэмцээний дүрмийг тодорхой болгож, тамирчдад зохиомол шалтгаанаар үндэслэлгүй дарамт үзүүлэх байдлаар тэмцээний үр дүнд нөлөөлөхийг дүрмэндээ хорих хэрэгтэй...