“Монгол Алтайн Барагшун” ХХК-ийн үйл ажиллагааг зогсоолоо

Нийслэлийн мэргэжлийн хяналтын газрын /НМХГ/ 70128012 утсанд ирүүлсэн иргэний гомдлын дагуу Баянгол дүүргийн 20-р хороонд үйл ажиллагаа явуулж буй “Монгол Алтайн Барагшун” ХХК-ийн  Биологийн идэвхт бүтээгдэхүүний үйлдвэрт хяналт шалгалт хийжээ.

Шалгалтаар тус компани шинэ эм хэрэглээнд гаргах шаардлага нөхцөлийг зөрчиж, улсын бүртгэлд бүртгэгдээгүй эм, биологийн идэвхт бүтээгдэхүүн үйлдвэрлэн худалдаанд гаргасан, үйлдвэрийн барилга нь зураг төслийн дагуу баригдаагүй, эрүүл ахуйн шаардлагад нийцээгүй ажлын байранд үйлдвэрлэл явуулж, түүхий эд, бүтээгдэхүүн, үйлчилгээнийхээ чанар, аюулгүй байдлыг хангаж, эрсдэлээс урьдчилан сэргийлж ажиллаагүй зэрэг зөрчил илэрсэн байна. Тиймээс  Зөрчлийн тухай хуулийн холбогдох заалтын дагуу үйлдвэрийн үйл ажиллагааг зогсоож, арга хэмжээ авсан талаар НМХГ-аас мэдээллээ.

Харин НМХГ-аас ийм мэдээлэл  гаргасны дараа “Монгол Алтайн Барагшун” компаниас мэдэгдэл гаргалаа.

Мэдэгдэлд "Өнөөдөр буюу 2019 оны нэгдүгээр сарын 31–ний өдөр манай компанийн тухай олон нийтийн мэдээллийн хэрэгсэл, мэдээллийн сайтуудаар гарсан компанийн үйл ажиллагааг зогсоох тухай мэдээлэл нь хэтэрхий нэг талыг барьсан, тухайн шийдвэрийг гаргахдаа үйлдвэрлэлийн процесс, технологийн горимыг мэдэхгүйгээр зөвхөн анхан шатны боловсруулалтын зургийг авч, олон нийтэд цацсан болчимгүй явдал гарлаа. Иймээс хэрэглэгч олон түмэн та бүхэнд үнэн зөв мэдээлэл хүргэх үүднээс өөрийн үйлдвэрийн байран дээрээс хэвлэлийн бага хурал хийж, үйлдвэрлэлийн процессийг тайлбарлах болно. Мөн энэ мэдэгдлээр дамжуулж, үйлдвэрийн дотоод дамжлага, үйлдвэрлэлийн процессийг танилцуулж байна. Хэрэв манай компанийн үйл ажиллагаанд итгэхгүй байгаа хэрэглэгч байвал ирж танилцаж болно. Та бүхэнд манай үүд хаалга үргэлж нээлттэй байх болно. Манай хамт олон барагшун үйлдвэрлэл болон бусад биологийн идэвхит бүтээгдэхүүн үйлдвэрлэлд тэргүүлэгч байгууллага болохоор хичээн ажиллаж байгаа үндэсний үйлдвэрлэгч компани юм” гэсэн байв.