ОЛОН ӨНГӨ: “The Hu” хамтлаг тайзыг эзэгнэсээр

Яг жилийн өмнө “The Hu-Yuve Yuve” хэмээх дуугаа “youtube” сувгаар түмэнд хүргэж 29 сая үзэлттэй болжээ. Энэ бол Монгол шиг жижиг улсаас төрөн гарсан хамтлаг, дуучны хувьд маш том амжилт.

Үүнээс хойших тэдний амжилт гэрлийн хурдаар л өсөн дэвжсээр байгаа юм. Дэлхийн зах зээлтэй өрсөлдөж тэр хэрээр алдар нэр хүнд, бизнесийг булаан авч байгааг хэлэх нь зөв биз. Тэд улс, муж, хотуудын томоохон тайзуудыг хэрэн хэссээр маш их үзэгч, фенүүдийгээ байлдан дагуулсаар яваа. Хуран цугларсан бүхэн л “HU HU HU HU HU” хэмээн хашхирч тэднийг тайзнаас буулгахыг хүсдэггүй гэнэ. Тэр хэрээрээ гаднын урлаг судлаач, сэтгүүлчид “The Hu” хамтлагийг судалж бас онцолсоор байна.

Олон түмэн “The Hu” хамтлагаар амьсгалж, биширч, шүтэцгээж байна. Тэгээд бүр дууных нь нэг ч үгийг ойлгохгүй атлаа даган цэнгэцгээж байгаа сонин. Саяхан болсон АНУ-ын Миссури мужийн Сейнт Луйз хотод болсон тоглолтод “The Hu” хамтлаг цугласан түмнийг байлдан дагуулсан тухай “Herald Whig” сонины хөгжмийн сэтгүүлч Майк Соренсен онцолжээ. Тэрбээр “Уламжлал болсон язгуур урлагаа металл роктой сүлэлдүүлж тоглож байгаа нь итгэмгүй. Тэд үзэгчдийг татаж байна. Гэхдээ хэлийг нь хэн ч мэдэхгүй, цугласан олон юу дуулж байгааг олйгохгүй ч даган дуулах. Ямар жигтэй!” хэмээсэн байна. Тэдний алдар хүнд дэлхий дахинаа нэгэнт тархжээ. Үүнээс илүү амжилтай ахиулж биднийг баясган гэдэгт итгэлтэй байна. Баяр хүргэе “THE HU”