“Рио Тинто” Австралийн уугуул иргэдийн түүхэн өвийг сүйтгэжээ

Англи, Австралийн хамтарсан “Рио Тинто” компани төмрийн хүдрийн уурхайгаа тэлэх зорилгоор Австралийн уугуул иргэдийн эртний түүхэн өв соёл болох 46 мянган жилийн настай агуйг дэлбэлж, сүйтгэснээ хүлээн зөвшөөрчээ. Австралийн баруун нутагт оршдог Жуукан хавцал дахь энэ соёлын өндөр ач холбогдолтой агуй нь Австралийн уугуул иргэдийн эзэмшиж байсан хамгийн эртний агуй аж. Тус компани долоон жилийн өмнө Австралийн Засгийн газраас олгосон зөвшөөрлийн дагуу өнгөрсөн ням гарагт тэсэлгээ хийсэн гэж мэдэгджээ.

2013 онд “Brockman 4” орд газарт үйл ажиллагаа эрхлэх зөвшөөрлийг Австралийн холбогдох сайд олгосон бөгөөд энэ бүсэд Жуукан 1, Жуукан 2 түүхэн өв болсон агуйнууд оржээ. “Рио Тинто” компани соёлын болон түүхэн дурсгалт газруудтай холбоотой асуудлаар уугуул иргэдийн төлөөлөлтэй идэвхтэй хамтран ажиллаж, соёлын болон түүхийн ач холбогдолтой газрыг хамгаалахын тулд үйл ажиллагаагаа өөрчилж ирсэн гэж тус компани мэдэгдсэн байна. “Рио Тинто” уул уурхайн үйл ажиллагаа эрхлэх зөвшөөрөл авсны нэг жилийн дараа археологийн малтлагын үер имжийн ясыг ирлэж хийсэн 28 мянган жилийн настай зэвсэг болон дөрвөн мянган жилийн настай хүний үсээр сүлжиж хийсэн бүс олжээ. ДНК-ийн шинжилгээгээр энэ бүс нутагт амьдарч буй уугуул иргэдийн өвөг дээдсийн генийг илрүүлсэн байна.

Puutu Kunti Kurrama уугуул иргэдийн холбооны тэргүүн Жон Эшбуртоны хэлснээр, эдгээр агуйг сүйтгэсэнд уугуул иргэд өвөг дээдэстэйгээ холбоо тасарсан хэмээн ихээхэн гашуудан, шаналж байна. Уугуул иргэд эл хавцалд тэсэлгээ хийх гэж байгаа тухай тавдугаар сарын 15-нд олж мэджээ. Тэсэлгээг зогсоохыг шаардсан уугуул иргэд хүчин мөхөстсөн байна. Өдгөө үлдсэн агуйнуудыг хамгаалах зорилгоор уугуул иргэд “Рио Тинто” компанитай ажиллаж байгаа бөгөөд бүх талын оролцоотой хэлэлцүүлэг зохион байгуулахыг шаардаж байна гэж Эшбуртон ярьжээ.

Баруун Австралийн Засгийн газар холбогдох хуульд нэмэлт өөрчлөлт оруулахаар ажиллаж байгаа гэнэ.