Хүүхдүүдийн халдварыг сургуулийн орчинтой холбож үзэхгүй байгаа
Нийслэлийн онцгой комисс (НОК)-оос долоо хоног бүр цаг үеийн нөхцөл байдлын талаар мэдээлэл хүргэж байгаа. Энэ удаагийн хэвлэлийн хурлын хүрээнд Нийслэлийн Эрүүл мэндийн газрын дарга Б.Бямбадорж тус мэдээллийг хүргэсэн юм.
Б.БЯМБАДОРЖ: ЖИРЭМСЭН ЭХ, ХҮҮХЭД ХАЛДВАР АВАХ НЬ
НЭМЭГДЭХ ХАНДЛАГАТАЙ БАЙНА
Тэрбээр "Улаанбаатар хотын халдварын нөхцөл байдлыг бид долоо хоног тутам графикаар гарган танилцуулдаг. 41 дэх долоо хоногийн хувьд өдөрт батлагдаж байгаа халдварын тоо 40 дэх долоо хоногтой харьцуулахад буурсан үзүүлэлттэй байна. Өмнөх долоо хоногт халдварын тохиолдол 3446 байсан бол, 41 дэх долоо хоногт 3196 болсон. Өмнөх долоо хоногт 28 жирэмсэн эх халдвар авсан бол, 41 дэх долоо хоногт 24 болсон байна. Харин халдвар авсан хүүхдийн тоо 682 болж нэмэгджээ.
Гэрийн хяналтанд байгаа иргэдийн тоо 38 дахь долоо хоногоос аажмаар буурч байгаа. 41 дэх долоо хоногт 26.957 байсан бол, өнөөдрийн байдлаар 23.998 болж буурсан байна. Хэвтэн эмчлүүлж байгаа иргэдийн тоо 41 дэх долоо хоногт 6556 байгаа нь өмнөх долоо хоногтой ижил байгаа. Энэ нь орны хүрээлцээтэй холбоотой юм.
Хүнд оноштой иргэн 1522 байсан боловч 41 дэх долоо хоногт 1613 болж өссөн. Нэн хүнд оноштой иргэн 277 байсан бол, 289 болсон байна. Орны эргэлтийн хувьд 720 иргэн эмнэлэгт хэвтэж эмнэлгээс гарч байгаа иргэдийн тоо 675 байсан бол, энэ долоо хоногт 661 иргэн эмнэлэгт хэвтэж 644 иргэн эмнэлгээс гарчээ. Энэ нь халдварын тоотой шууд хамааралтай юм. Бид тандалт, хариу арга хэмжээг сайжруулах үүднээс Нийслэлийн Засаг даргын 2021 оны 722 тоот захирамжаар сайн дурын ажилтнуудыг ажиллуулж байгаа. Аравдугаар сарын 18-ны байдлаар 53 жолооч ажиллаж байсан бол, өнөөдөр 45 жолооч ажиллаж байна.
Дархлаажуулалтын 49 суурин цэгт Вероселл, Файзер вакцины сонголттойгоор дархлаажуулалт хийж байгаа юм. Мөн 36 явуулын баг ажиллаж, үүнд 352 эмч, эмнэлгийн ажилтан ажиллаж байна. Аравдугаар сарын 20-нд хоёр их сургуулийн 174 оюутан, хоёр байгууллагын 42 ажилтан, гэрээр 141 хүнийг нэмэлт дархлаажуулалтад хамруулсан. Нийт 11 их, дээд сургуулийн 1803 оюутан, 15 байгууллагын 1261 ажилтан, гэрээр 1850 иргэнийг нэмэлт дархлаажуулалтад хамруулаад байна. Мөн гэрийн асаргаанд байдаг 679 хүн нэмэлт тун хийлгэсэн.
УОК-ын Нэгдсэн шуурхай штабаас өнгөрсөн долоо хоногт “Ковид-19”-ийн хариу арга хэмжээний үйл ажиллагаанд ДЭМБ-аас хүлээн зөвшөөрсөн нэгдсэн аргачлалын дагуу үнэлгээ хийж байгаа. Энэхүү үнэлгээний дагуу цаашид хэрэгжүүлэх арга хэмжээний сайжруулсан зөвлөмжүүд гарна. 2022 онд нийслэлийн хэмжээнд “Ковид-19”-ийн эсрэг хариу арга хэмжээний хүрээнд шинэчилсэн төлөвлөлт хийх ажлын хэсэг гарсан.
Бид өнгөрсөн хугацаанд “Ковид-19”-ийн эсрэг авч хэрэгжүүлсэн эмнэлгийн тусламж үйлчилгээ, вакцинжуулалт, нийгмийн эрүүл мэндийн арга хэмжээний бүхий л чиглэлээр онол практикийн бага хурлыг зохион байгууллаа. Энэхүү хуралд улаан бүсэд ажиллаж байгаа эмч, сувилагч нар цахимаар оролцож 52 илтгэл танилцуулсан. Мөн асаргаа, вакцинжуулалт, хэвтэн эмчлүүлэлт, эрчимт эмчилгээ, хүчилтөрөгчийн хангамж зэрэг олон сэдвээр хэлэлцүүлэг өрнүүллээ. Үүний дагуу зөвлөмж гаргаж эрүүл мэндийн байгууллагуудад хүргэнэ” гэсэн мэдээллийг өглөө.
ЧАНАРЫН ШААРДЛАГА ХАНГАСАН ОНОШЛУУР ХЭРЭГЛЭСЭН БОЛ
ШИНЖИЛГЭЭНИЙ ХАРИУГ БАТТАЙД ТООЦНО
-Халдвар авсан иргэдийн нас баралт залуужиж байна. Ямар арга хэмжээ авч байна вэ?
-Ор зохицуулалтын нэгдсэн удирдлагад шилжсэнээр хүнд болон нэн хүнд эрэмбээр эрэмбэлэгдсэн иргэдийг өрхийн эмчийн хяналтаас шууд эмнэлгийн тусламж үйлчилгээнд авч байгаа. Мөн жирэмсэн болон эрсдэл өндөртэй иргэдийг тухайн өдөрт нь эмчилгээнд хамруулж байна.
Халдвар аваад нас барсан иргэдийн дийлэнх нь эмнэлэгт өөд болсон байна. Гэрийн нас баралт бага хувийг эзэлж байгаа. Өнгөрсөн хугацаанд гарсан гэрийн нас баралтууд архаг өвчний төгсгөлийн шатанд эмчилгээнд байж байгаад үргэлжлүүлэн өрхийн эмнэлгийн хяналтад байсан иргэд юм. ЭМЯ-нд нас баралтын шалтгааныг тогтоох комисс ажилладаг. Энэ комиссоос нас баралтын шалтгаан “Ковид-19”-ийн байсан уу, өөр шалтгаантай байсан уу гэдгийг мэдээлдэг.
Коронавирусын халдварын эсрэг тусламж үйлчилгээ үзүүлж байгаа Өрхийн эрүүл мэндийн төв, анхан шатны эмнэлгийн байгууллагуудад байнгын мониторинг хийх, дэмжлэг үзүүлэх үүднээс эмч нарт Юнителийн 220 дугаар олгосон. Нийт 11.773 дуудлага ирснээс 140 дуудлагад хариу өгч амжаагүй байна. Дийлэнх дуудлага өглөөний 08:00-09:00, 11:00-13:00 цагт ирж байна гэсэн судалгаа гарсан. Аравдугаар сарын 03-наас 21-ний хооронд өдөрт дунджаар 700-800 дуудлага ирсэн байна.
-Түргэвчилсэн шинжилгээний хариу зөрүүтэй гарах тохиолдлыг хэрхэн тайлбарлах вэ?
-ЭМЯ-наас түргэвчилсэн шинжилгээний оношлуурын тестүүдэд үнэлгээ хийн, есөн байгууллагын оношлуурыг хэрэглэхийг зөвлөсөн.
Чанарын шаардлага хангасан оношлуур хэрэглэж байгаа нөхцөлд шинжилгээний хариуг баттай гэж үзэж болно. Ойрын хавьтлууд, өндөр эрсдэлтэй, өрхийн эмчийн хяналтад байгаа иргэдэд тандалтын багаас тогтмол шинжилгээ хийж байгаа.
Нийслэлийн хэмжээнд PCR болон түргэвчилсэн шинжилгээ, шинж тэмдэг илэрсэн бүх иргэнийг нэгтгэн мэдээлж байгаа. Бүх иргэнээ хяналтад хамруулах нь чухал. Халдварын тоо буурч байна гээд тайвширч болохгүй. Халдвар тархах нөхцөл хүнээс хамааралтай.
Иргэд халдвараас сэргийлэх бүрэн боломж бий. Тиймээс амны хаалтыг тогтмол зүүх, тодорхой хугацаанд сольж байх, хүн хоорондын зай барих, нэг танхимд хэт олуулаа байхгүй байх, эрүүл мэндийн байгууллагын зааварчилгааг мөрдөх нь зүйтэй. Ингэж чадвал эрсдэлээс өөрийгөө хамгаалж чадна.
-Хүүхдийн халдвар авсан байдлыг хэрхэн дүгнэж байна вэ. Сургуулийн орчин ямар байна вэ?
-Хүүхдүүдийн халдварыг сургуулийн орчинтой холбоотой гэж үзэхгүй байгаа. Тархвар судлаачдын ирүүлсэн мэдээллээр гэр бүлийн орчноос халдвар авах тохиолдол давамгай байна гэсэн судалгаа гарсан.
Тиймээс гэр бүлийн нэг гишүүн халдварын нөхцөлд орсон байх магадлалтай бол нэн тэргүүнд өөрийгөө тусгаарлах, аяга халбага, ахуйн хэрэглээний зүйлсээ тусдаа хэрэглэх хэрэгтэй байна.
ХҮНДЭВТЭР ОНОШТОЙ ИРГЭДИЙН ТОО ӨСЖЭЭ
НОК-оос зохион байгуулсан хэвлэлийн хурлын үеэр НЗДТГ-ын хэвлэлийн төлөөлөгч Н.Сугар эмнэлгийн тусламж, үйлчилгээний талаар мэдээлэл өглөө.
Тэрбээр "Өнгөрсөн долоо хоногт 6001 ороор эмнэлгийн тусламж үйлчилгээ үзүүлж байсан бол, энэ долоо хоногт 6098 ор байна. Энэ нь 97 ороор нэмэгдсэн үзүүлэлт юм. Үүнээс 258 нь эрчимт эмчилгээний ор бол, 5840 нь энгийн эмчилгээний ор байна.
Мөн өнгөрсөн долоо хоногт 6429 хүн эмчлүүлж байсан бол энэ долоо 6513 болж өслөө. Эмнэлгүүдийн ачаалал их байна. Эмч нарын өрөө болон бусад боломжит өрөө тасалгаануудад ор дэлгэн ажиллаж байгаа.
Түүнчлэн өнгөрсөн долоо хоногт эмчлүүлж байсан иргэдийн 18 хувь нь хөнгөн оноштой байсан бол, энэ долоо хоногт 16.1 хувь нь хөнгөн оноштой байна. Эдгээр иргэн хэдийгээр хөнгөн оноштой гэж байгаа ч хавсарсан өвчтэй, хавдартай, эрүүл мэнд нь хурдан хугацаанд муудах эрсдэлтэй, эмнэлгийн хяналтад байх шаардлагатай байгаа юм. Харин хүндэвтэр оноштой иргэдийн тоо энэ долоо хоногт өссөн. Өнгөрсөн долоо хоногт 52.9 хувь байсан хүндэвтэр оноштой иргэдийн тоо энэ долоо хоногт 55 хувь болж өссөн байна.
Аравдугаар сарын 21-нд 669 иргэн эмнэлэгт хэвтсэн бол, 698 иргэн эмнэлгээс гарсан байна. Энэ нь орны эргэлт сайн байгааг харуулж байгаа юм. Эрчимт эмчилгээний тасагт 15 хүн хэвтэж, 13 хүн гарсан. Үүнээс харахад, эрчимт эмчилгээний орны эргэлт удаашралтай байна. Гэрээр эмчлүүлж байгаа 28 мянга орчим иргэн байсан бол одоо 23.998 болж буурсан.
Вакцины нэмэлт тунд хамрагдалт өнгөрсөн долоо хоногт 17.6 хувь байсан бол энэ долоо хоногт 18.8 хувь болж ердөө 1.2 хувиар өссөн нь иргэдийн идэвхи муу байгааг харуулж байна.
Нэмэлт гуравдугаар тун хийлгэсэн иргэдийн халдвар авсан байдлын талаар ХӨСҮТ дээр судалгаа хийж байгаа. Судалгааны дүн гараагүй байгаа ч нэмэлт тун хийлгээд хугацаа өнгөрөх тусам халдвар авсан хүмүүсийн тоо бага байна гэсэн мэдээлэл бий. Тиймээс иргэдийг нэмэлт тундаа идэвхитэй хамрагдахыг уриалж байна" гэв.
Сэтгэгдэл ( 0 )