Сэтгэцийн өөрчлөлтөд орсон Эзра Миллер уучлалт гуйв

"Fantastic Beasts" киноны од жүжигчин Эзра Миллер сэтгэцийн өөрчлөлтөд орсноо хүлээн зөвшөөрчээ. Эмчилгээ хийлгэж эхлээд байгаа тэрээр өмгөөлөгчөөрөө дамжуулан энэ бүх цаг хугацаанд бусдад гаргасан зан авирынхаа төлөө уучлалт гуйжээ. 

Он гарснаас хойш тэрээр хэд хэдэн гэмт хэрэгт холбогдсон. Зарим хэргүүд нь олон нийтийн гайхшрал, эгдүүцлийг зэрэг төрүүлж байсан бөгөөд түүнтэй хамт амьдарч байсан 25 настай эмэгтэй 5, 4, 1 настай хүүхдүүдийн хамтаар сураггүй алга болсон нь хамгийн том дуулианыг дэгдээж байв. 

Тэрээр өнгөрөгч тавдугаар сард айлын гэрээс архи хулгайлсан хэрэгт холбогдсон. Хэрэг гарах үед байшин эзгүй байсан бөгөөд тэрээр өөрийгөө энэхүү хэрэгт буруугүй хэмээн мэдүүлжээ. Харин камерын бичлэгийг шалгасан ажилчид түүнийг буруутайг нотлох баримт олсон хэмээн мэдүүлсэн байна. 

Энэхүү хэргийн дагуу түүний гэрт мөрдөн шалгах ажиллагаа явуулсан цагдаа нар гэрээс нь их хэмжээний марихуан болон галт зэвсэг, сум зэргийг олжээ. Түүний гэрт амьдарч байсан хүүхдүүдийн чихмэл тоглоомын хажууд буу байсан нь дүрс бичлэгт хадгалагдан үлдсэн байна.

Сураггүй алга болсон нэг настай охин бууны сум амандаа хийсэн явж байхыг харсан тухайгаа нэгэн эх сурвалж ярьжээ. Эзра Миллер мөн хүүхдүүдийн дэргэд марихуан их хэмжээгээр татдаг байсан нь тогтоогдсон бөгөөд одоог хүртэл ээж болон хүүхдүүдийг олсон эсэх нь тодорхойгүй байна. 

Хачин жигтэй байдлаараа алдартай "Flash" киноны од ээж болон хүүхдүүд түүний гэрт хэдэн сарын турш амьдраагүй хэмээн наймдугаар сард мэдүүлсэн байдаг. Гэсэн ч зургаадугаар сард өгсөн ярилцлагадаа ээж болон хүүхдүүдийг аюулгүй, тав тухтай орчинд амьдруулахын тулд хичээж байгаа тухайгаа ярьжээ. 

Тэрээр алга болсон бүсгүйтэй Хавайд байхдаа танилцсан бөгөөд дөрөвдүгээр сараас эхлэн хамтран ажиллаж эхэлсэн аж. Түүний өгсөн мэдүүлгүүд хариуцлагаас зугатахыг оролдож буй явдал хэмээн холбогдох албаныхан онцолсон байна. 

Түүний архи хулгайлсан хэргийн шүүх хурал болж өнгөрсөн бөгөөд оршин суугчидтай харилцахгүй байх, гэрт нь нэвтрэхгүй байх арга хэмжээ авчээ.